Ոստիկանները այսօր աննախադեպ բռնի ուժ կիրառեցին «Հարսանքար» ռեստորանային համալիրում դաժան ծեծի ենթարկված և մահացած Վահե Ավետյանի հիշատակին կազմակերպված մոմավառություն մասնակիցների նկատմամբ:
Նախապես ծրագրված մոմավառությունը «Հարսնաքար» ռեստորանային համալիրի մուտքի մոտ չկայացավ, քանի որ հարյուրավոր ոստիկաններ թույլ չէին տալիս ակցիայի մասնակիցներին մոտենալ համալիրի շենքին:
Ակցիայի մասնակիցներից մեկի պահանջին ներկայացնել ոստիկանի վկայական ոստիկանները չարձագանքեցին:
Ոստիկանությունից չստանալով թույլտվություն` մոտենալու«Հարսնաքարի» մուտքին և Վահե Ավետյանի մահվան պատճառ դարձած ծեծի վայրին, ակցիայի մասնակիցների միահամուռ որոշմամբ փակվեց ռեստորանի հարևանությամբ գտնվող գլխավոր պողոտան:
Այնուհետև ոստիկանական բազմաթիվ խմբեր, բերետավորներ դուրս գալով «Հարսնաքար» ռեստորանային համալիրի ավտոկանգառի հատվածից, մոտեցան փողոցը փակած ակցիայի մասնակիցներին և բիրտ ուժ կիրառելով, ծեծի ենթարկելով ակտիվիստներին սկսեցին բացել պողոտան: Այս ընթացքում ակցիայի մասնակիցները չէին դադարեցնում «Նե-մեց,մար-դա-սպան» վանկարկումները:
Բռնի ուժ կիրառելով`ոստիկանները բացեցին ճանապարհը: Լրագրողների խնդրանքին մեկնաբանել ոստիկանության գործողությունները` Երևանի փոխոստիկանապետ Ռոբերտ Մելքոնյանը պարզաբանեց, որ սա սգո արարողություն չէ.«Ամոթ ա, դիակի վրա նման բաներ անել»:
Ինչպես հետո հայտարարեց «Սարդարապատ» շարժման նախաձեռնող անդամ Գարեգին Չուքասզյանը ակցիայի մասնակիցները երթով շարժվելու են Ռուբեն Հայրապետյանի տան մոտ, որը գտնվում է Ավան թաղամասում: Երթի հարյուրավոր մասնակիցներ «միացիր Ավան» «նեմեց խուլիգան» վանկարկումներով հարյուրավոր ոստիկանների ուղեկցությամբ հասան Ռուբեն Հայրապետյանի սեփական տուն:Այն արդեն նախապես «պաշարվել» էր ոստիկանության հարյուրավոր ծառայողների կողմից: Ռուբեն Հայրապետյանի տան մոտ իրենց բողոքի խոսքն ուղղված ոստիկաններին հայտնեցին «Սարդարապատ» շարժման անդամ Գարեգին Չուքասզյանը, ակտիվիստ Վարդգես Գասպարին և ՄԻ նախկին պաշտպան Լարիսա Ալավերդյանը:
Հիշեցնենք, որ այսօր լրանում է հունիսի 17-ին ԱԺ ՀՀԿ-ական պատգամավոր Ռուբեն Հայրապետյանին պատկանող «Հարսնաքար» ռեստորանային համալիրում դաժանաբար ծեծի ենթարկված և հունիսի 29-ին մահացած Կենտրոնական կլինիկական զինվորական հոսպիտալի ԼՕՌ բաժանմունքի ղեկավար, մայոր Վահե Ավետյանի մահվան 7 օրը: Ինչպես նրա մահվան հաջորդ օրը, այսօր ևս քաղաքացիական հասարակությունը, դեպքից մտահոգված անձինք յոթնօրեքի կապակցությամբ, ի հիշատակ Վահե Ավետյանի, «Հարսնաքար» ռեստորանային համալիրում` նրա զոհվելու վայրում, կազմակերպել են մոմավառություն: Քաղաքացիական նախաձեռնությունների նպատակն է մոմավառությամբ կրկին հարգել Վահեի հիշատակը և ցույց տալ հասարակության միասնականությունը:
