Այսօր մի շարք երկրներում բնապահպանական միջավայրի բարելավման համար ավտոմեքենաների ձեռքբերման պետական սուբսիդավորման ծրագրում փոփոխություններ մտցնելու ճանապարհով հատուկ զեղչեր են տրամադրվում այլընտրանքային վառելիքով աշխատող ավտոմեքենաների տերերին: Հայաստանի, մասնավորապես Երևան քաղաքի համար շատ կարևոր է էկոլոգիապես առողջ միջավայրն առանց արտանետումների: Ինչպես «Առաջին լրատվական»-ի հետ զրույցում տեղեկացրեց «Աքիլլես» ավտովարորդների իրավունքների պաշտպանության կենտրոնի ղեկավար Էդգար Հովհաննիսյանը, հիբրիդային ավտոմեքենաներն, անխոս, էկոլոգիապես ավելի ձեռնտու են:
Ըստ նրա՝ այստեղ կարևոր է այն, թե ինչ քաղաքականություն կորդեգրեն այն մարմինները, որոնք պետք է որոշում կայացնեն: Էդգար Հովհաննիսյանի խոսքով՝ այդ համակարգի ներդրման համար պետք է ստեղծվեն էլեկտրական լիցքավորման կայաններ, քանի որ Հայաստանում կան մարդիկ, որոնք ունեն հիբրիդային ավտոմեքենաներ, սակայն դրանք չեն շահագործվում իրենց նշանակությանը համապատասխան:
«Այդ մեքենաներն աշխարհում մեծ ժողովրդականություն են վայելում, մի քանի ավտոարտադրող ֆիրմաներ վաղուց արտադրում են այս ավտոմեքենաները: Այս մեքենաներն արդեն շահագործվում են արտասահմանում, մեզ մոտ չեմ կարծում, որ մոտակա ժամանակահատվածում այդպիսի հեռանկար ունենանք, թեկուզ մոտակա 5-6 տարիների ընթացքում: Գիտությունը, տեխնիկան առաջ է գնում, ըստ երևույթին պետք է սկսել նաև մեզ մոտ կիրառել»,- մեկնաբանեց մասնագետը՝ շարունակելով, որ ճիշտ է այսպիսի մեքենաների կիրառությունը Հայաստանում: Նրա փաստմամբ՝ այս մեքենաների օգտագործման համար պետք է սկսվի դրանց համար սպասարկման ինչ-որ ծառայություններ (սերվիսներ) ներդնել:
