Ադրբեջանի առաջին նախագահ (1991-1992թթ.) Այազ Մութալիբովը երեկ երեկոյան ՌԴ-ից վերադարձել է Բաքու: Վերջին 20 տարիներին նա բնակվել է Ռուսաստանում, որոշ տվյալներով` վերջին տարիներին եղել է Մոսկվայում:
Ինչպես տեղեկացնում է Vesti.ru-ն, նախկին նախագահին Հեյդար Ալիևի անվան միջազգային օդանավակայանում դիմավորել են նրա հարազատներն ու մտերիմները:
Պետության կողմից Մութալիբովին տրամադրված թիկնազորի ուղեկցությամբ նա ուղևորվել է Բաքվի ծայրամասում գտնվող իր տուն: Մութալիբովի վերադարձը Ադրբեջան հնարավոր է դարձել երկրի խորհրդարանի կողմից ընդունված «Նախկին նախագահին և նրա ընտանիքի անդամներին ապահովելու մասին» օրենքի շնորհիվ:
Օրենքի համաձայն` նախկին նախագահը կստանա ամսական թոշակ`գործող նախագահի աշխատավարձի 50 տոկոսի չափով: Հավելյալ ծախսերի համար նրան կտրամադրվի գումար` գործող նախագահի աշխատավարձի 20 տոկոսի չափով: Պետության նախկին ղեկավարի մահվան դեպքում նրա թոշակը կփոխանցվի կնոջը:
Օրենքը նախատեսում է նախկին նախագահին տրամադրել ավտոմեքենա, անձնական վարորդ և 3 թիկնապահ: Նախկին նախագահի և նրա կնոջ անձեռնմխելիությունը կպաշտպանվի օրենքով:
Այազ Մութալիբովին մեղադրում էին ղեկավարման ընթացքում իրականացրած մի շարք ծանր հանցագործությունների մեջ:
