ԱՄՆ-ը մտադիր է մինչև 2017 թվականը Աֆղանստանին ֆինանսական օգնություն տրամադրել: Ինչպես հաղորդում է Associated Press-ը` այս մասին հայտարարել է ԱՄՆ պետքարտուղար Հիլարի Քլիթոնը Աֆղանստանի հարցերով Տոկիոյում տեղի ունեցած կոնֆերնասի ժամանակ:
Քլինթոնի խոսքով` առաջիկա 5 տարվա ընթացքում Աֆղանստանին ֆինանսապես օգնելու հարցը մոտ ժամանակներս կուղարկվի Կոնգրես: Ենթադրվում է, որ օգնության գումարի ամենամյա չափը կորոշվի` ելնելով վերջին 10 տարվա ընթացքում Աֆղանստանին տրամադրված օգնության` ամերիկյան կողմի ծախսերի միջին ցուցանիշից: Այլ մանրամասներ Քլիթոնը չի նշել, միայն հայտնել է, որ այդ օգնությունը Աֆղանստանին հնարավորություն կընձեռի վերականգնելու տնտեսությունը և իրականացնելու անհրաժեշտ բարեփոխումներ:
Գործակալության փոխանցմամբ` Աֆղանստանին տրամադրված ԱՄՆ օգնությունը 2001-ին տատանվել է 1 միլիարդի, իսկ 2012-ին` մինչև 2,3 միլիարդ դոլարի սահմանում:
Աֆղանստանի նախագահ Համիդ Քարզայը 2012-ի ապրիլին հայտարարել էր, որ Միացյալ Նահանգները 2014 թվականից հետո իր երկրին պետք է տրամադրի տարեկան նվազագույնը 2 միլիարդ դոլար:
ԱՄՆ Կոնգրեսի ստորին պալատի անդամները 2012-ի մարտին դիմել էին ֆինանսական վերահսկողության մարմին` պահանջելով ստուգել, թե ինչպես են ծախսվում Աֆղանստանին տրամադրված միջոցները, քանի որ ենթադրվում էր, թե դրանք թալանվում են նախագահի և նրա ընտանիքի կողմից:
Տոկիոյի կոնֆերանսին, որին մասնակցում են 70 երկրների պատվիրակություններ, քննարկվում է 2014 թվականից հետո Աֆղանստանի զարգացման հարցը: 2014-ին կոալիցիոն զորքերը կլքեն երկիրը: Կոնֆերանսի մասնակիցներն արդեն որոշել են, որ մինչև 2015 թվականը իրենք համատեղ ուժերով Աֆղանստանին կտրամադրեն 16 միլիարդ դոլար:
