Ապագայում ծրագրվում է հետմահու թողարկել բրիտանացի աստղ Էմի Ուայնհաուսի մեկ կամ երկու ալբոմ:
Այս մասին BBC 6-ին հաղորդել է երգչուհու հայրը՝ Միտչ Ուայնհաուսը: Նրա խոսքով՝ կատարողի արխիվում չթողարկված բազմաթիվ ստեղծագործություններ կան: Ըստ նրա՝ ձայնագրված նյութը կբավականացնի նվազագույնը մեկ լիարժեք ձայնասկավառակի համար:
Միտչ Ուայնհաուսը հաղորդել է, որ Էմիի արխիվի մեծ մասը կազմում են երգերի վերափոխված տարբերակները: Երգչուհու հայրը չի նշել, թե երբ կթողարկվեն ձայնասկավառակները:
Էմի Ուայնհաուն արդեն մեկ հետմահու ձայնասկավառակ ունի: «Lioness: Hidden Treasures»-ը թողարկվել էր նրա մահից ամիսներ անց: Նախկինում անհայտ 12 ստեղծագործություններից բաղկացած ալբոմը զբաղեցրել է բրիտանական երաժշտական հիթ շքերթի առաջին հորիզոնականը:
