Շուշան Պետրոսյանն ԱԺ-ում երկու նախագիծ ունի առաջարկելու: Այս մասին այսօր լրագրողների հետ հանդիպման ժամանակ տեղեկացրեց ԱԺ պատգամավոր, ժողովրդական արտիստ, երգչուհի Շուշան Պետրոսյանը՝ անդրադառնալով իր ծրագրերին ԱԺ-ում: Լրագրողներից մեկի հարցին` ի՞նչն է խոչընդոտում, որ ԱԺ-ում բարձրացնի մշակութային մի շարք հարցեր, պատասխանեց. «Ես քանի՞ օր եմ ԱԺ-ում: Սպասեք էլի, հինգ օր եմ ԱԺ-ում»:
Շուշան Պետրոսյանը նշեց, որ հետաքրքիր երկու նախագիծ ունի, որոնք առաջիկայում պետք է գլուխ բերի: Երգչուհու փոխանցմամբ՝ խոսքը բանակի և մշակույթի կապերի մասին է: «Ամսի տասնհինգից հետո կասեմ, կգնամ սահման, կգամ կասեմ: Հիմա այդ ծրագիրն ինձ համար կարևոր է, ուզում եմ պահպանել չար աչքից: Հուրախություն ինձ՝ նկարիչների հետ կապված առաջարկն անսպասելի հայտնվեց իմ օրակարգի մեջ, պետք է հնարավորինս օգնել նկարիչներին»,- մանրամասնեց Շուշան Պետրոսյանը:
Երգչուհին հեռուստատեսություններում հրաշալի զարգացնող ծրագրեր համարեց «Հայ ասպետը» և «Երգ երգոցը»: Ըստ նրա՝ եթե այդ ծրագրերի վրա շատ գումար դրվեր, լավ դեկորներ, ձայնային, լուսային էֆեկտներ ապահովվեին, ավելի մեծ հաջողություն կունենար: Շուշան Պետրոսյանը նաև ասաց, որ գրքի տոն է ցանկանում զգալ: Նրա կարծիքով՝ գրքի տոնը միայն մեկ համերգ կազմակերպելով չէ:
Հարցին` չի՞ վախենում ԱԺ-ում բախվեն քաղաքական գործիչն ու մտավորականը, պատասխանեց, որ բախվելու փորձության առջև չի կանգնել և լավատես է ուզում լինել, որ չեն բախվի: «Հնարավորինս ամեն ինչ պետք է անեմ, որ բարելավվեն այն ոլորտները, որտեղ մտավորականները գործում են: Համառությամբ կհաղթեմ որպես մտավորական: Մտավորականը հաղթած է: Աստված տա, որպես քաղաքական գործիչ ևս հաղթեմ, շատ կարևոր է այդ տեսակը չկորցնել այնտեղ և կարողանալ առաջ տանել»,- նշեց Շուշան Պետրոսյանը:
