Այսօր լրագրողների հետ հանդիպման ժամանակ «Կարին» ավանդական երգի-պարի խմբի հիմնադիր և գեղարվեստական ղեկավար Գագիկ Գինոսյանը, ՀՀ վաստակավոր արտիստ Շուշան Պետրոսյանը, «Հայֆոն» շարժման ակտիվիստ Նունե Հայրապետյանը խոսեցին «Ազգային երգի ու պարի պրոպագանդման անհրաժեշտությունը» թեմայով` եզրակացնելով, որ ազգային երգի ու պարի պրոպագանդա չի իրականացվում:
Գագիկ Գինոսյանը նշեց, որ խնդիրը լայն սպեկտոր ունի և լուծումը միակողմանի չէ՝ մշակութային քաղաքականության բացակայություն, հեռուստատեսության ոչ պրոպագանդա, ֆինանսական խնդիրներ: «Ուզում եմ հիշել Գարեգին Նժդեհի խոսքերը. «Մամուլ շատ ունենք՝ հատկապես ավելորդ», ես կասեի հեռուստաընկերություն շատ ունենք, հատկապես ավելորդ:
Կառավարական համերգներում պետք է բացառվի ապազգային մշակույթը, հովանավորչությունը պետք է ուղղված լինի բարձրաճաշակ մշակույթին: Այսինքն՝ լուրջ ներդրումներ պետք է արվեն: Պետությունը խնդիր ունի սերունդ դաստիարակելու և ՀՀ քաղաքացի դաստիարակելու, սա բացակայում է Հայաստանում: Նախընտրական շրջանում որևէ կազմակերպության կողմից այս հարցը չբարձրացվեց: Կառավարական համերգին պետք է ինի Կոմիտաս, Եկմալյան և այլն: Երբ քո կառավարական հյուրին տանում ես ջազ լսելու, դա քո երկրի մասին է խոսում»,- մեկնաբանեց Գագիկ Գինոսյանը:
Համատեղ ասուլիսի ընթացքում ԱԺ պատգամավոր, երգչուհի, վաստակավոր արտիստ Շուշան Պետրոսյանն ասաց, որ ֆինանսական խնդիրն այն խնդիրն է, որի պատճառով լավ արտիստների չենք կարող տեսնել: Ըստ նրա՝ շատ շնորհքով երիտասարդներ կան:
«ԽՍՀՄ տարներին, երբ ամեն ինչ փակ էր, օդ չկար շնչելու, ազգային մշակույթից սկսած ուզում էին ինտեգրել սոցիալիստական գաղափարով, պահպանվում էր մշակույթը, կային ծրագրեր, որտեղ հայ մշակույթն էր ներկայացվում: Այսօրվա մշակույթի մեջ կորում է մեր մշակութային գիծը: Պետք է ուսումնասիրել, թե որոնք են հայ մշակույթի ակունքները: Այսօր նախագծեր չկան, երաժշտական ոչինչ չկա, իսկ հայ մշակույթը հիթ-շքերթներում ներկայացվող երաժշտությունը չէ»,- նշեց Շուշան Պետրոսյանը՝ հավելելով, որ մինչև դու քո պատմությունը չիմանաս, չես կարող աշխարհին երևալ:
