Ուկրաինայում նկատվում է նոր միտում՝ իշխանության «ֆամիլիզացիա»: Յանուկովիչի «ընտանիքի» հսկողությունը իշխանության հիմնական օջախների վրա ուժեղանում է: ԱՄՆ-ը կարող է պատժամիջոցներ կիրառել Ուկրաինայի իշխանությունների դեմ: Այս մասին հայտարարել է Freedom House իրավապաշտպանական կազմակերպության ղեկավար Դևիդ Քրեյմերը՝ ներկայացնելով Ուկրաինայում տիրող իրավիճակը:
«ԱՄՆ կոնգրեսում ուսումնասիրվում է օրինագիծ՝ ուղղված աժաջին հերթին Ռուսաստանի դեմ՝ մարդու իրավունքները խախտած պաշտոնյաների ակտիվները սառեցնելու և նրանց մուտքն արգելելու վերաբերյալ: Համաձայն այդ օրինագծի վերջին, խմբագրված տարբերակի՝ այն կարող են կիրառել նաև այլ երկրների, այդ թվում՝ Ուկրաինայի նկատմամբ»,- ասել է նա:
Նրա խոսքերով՝ «Ուկրաինա» և «պատժամիջոցներ» բառերը գնալով ավելի հաճախակի են միասին օգտագործվում, և դրանով արտահայտվում է արևմտյան պաշտոնյաների հիասթափությունը Վիկտոր Յանուկովիչից, որը կարծես թե չի լսում և չի ցանկանում լսել իրենց փաստարկները:
Քրեյմերն ասել է, որ Freedom House-ը հույս ունի, որ «ԱՄՆ-ի կողմից հնարավոր պատժամիջոցներն ազդանշան կհանդիսանան Ուկրաինայի իշխանությունների վերին ատյանների համար առ այն, որ նրանք գտնվում են սխալ ճանապարհի վրա»:
Քրեյմերի խոսքերով՝ վերջին շրջանում արդարացվել են իր կազմակերպության հիմնական մտավախությունները Ուկրաինայի հարցով. Կոռուպցիան և ընդդիմության ընտրական հետապնդումները շարունակվում են և դարձել են հիմնական սպառնալիքները Ուկրաինայում ժողովրդավարության համար:
«Freedom House-ի նախորդ հաշվետվության հրապարակումից հետո առավել ուշագրավ պահ է հկոչված «ֆամիլիզացումը», այսինքն՝ Ուկրաինայում իշխանության և կոռուպցիայի ամրապնդման գործում տոհմական կապերի դերը: Այդ եզրը, որը մենք առաջին անգամ լսեցինք 2012թ. ապրիլին մեր մոնիտորինգային այցի ընթացքում, ցույց է տալիս, թե ինչպես պաշտոնատար անձինք, մասնավորապես նախագահ Յանուկովիչը և նրա շրջապատը, ոչ միայն հարստացել են իշխանությունում եղած ժամանակ, այլև նրանց հարազատները զարամանլիորեն արագ դարձել են ազդեցիկ և բարգավաճ: Որոշ հետազոտողներ դա անվանում են «ընտանիք» ստեղծելու միտում, որում նախագահի որդիներն ու ընկերներն ավելի շատ քաղաքական և տնտեսական իշխանություն են ձեռք բերում»,- ասվում է հաշվետվության մեջ:
