Երեկ «Ազատություն» ռադիոկայանն անդրադարձել էր Հրազդանի բնակիչ Շահեն Հայրապետյանի պատմությանը, ում «Երևան Սիթի» խանութի նկուղում ընկերների օգնությամբ դաժան ծեծի էր ենթարկել ԱԺ պատգամավոր Սամվել Ալեքսանյանի եղբոր որդին` Արտակ Ալեքսանյանը: Ըստ այդ հրապարակման` Շահեն Հայրապետյանին ծեծելու պատճառ է եղել նրա ունեցած երեք միլիոն պարտքը, որը գոյացել էր «Սուարեն» ֆիրմայի քաղցրավենիքն առաքելուց: Սակայն «Ժամանակ»-ի հավաստի աղբյուրներից հայտնի դարձավ, որ Շահեն Հայրապետյանի պատմությունը այլ պատճառ ունի: Բանն այն է, որ առանց կենտրոնական գրասենյակի հետ պայմանավորվելու` Սամվել Ալեքսանյանի տոհմի ներկայացուցիչներն արդեն մեկ ու կես տարի է` դարձել էին «Սուարեն» քաղցրավենիքի միակ ներկրողները: Վերջերս ոչ Ալեքսանյանների կողմից Հայաստան է ներկրվել «Սուարենի» տեսականու նոր խմբաքանակ, որը Հայաստանի մարզերով առաքողներից մեկն է եղել հենց Շահեն Հայրապետյանը: Եվ բուն ներմուծողին վախեցնելու և բիզնեսը շարունակելու մտադրությունից հետ պահելու համար Ալեքսանյան կրտսերը ձեռնամուխ է եղել Շահեն Հայրապետյանի դաժան ծեծին:
