Սյունիքի մարզի Նռանաձորի (նախկին Նյուվադի) գյուղապետ Մկրտիչ Մկրտչյանը «Առաջին լրատվականի» հետ զրույցում ասաց, որ գյուղացիների հետ բացատրական աշխատանքներ են տանում, որպեսզի գյուղացիները առանց հսկողության չթողնեն անասուններին:
Հիշեցնենք, որ հունվարի 14-ին համայնքի 3 ընտանիքների պատկանող թվով 14 կով կորել էր հենց արոտավայրից։ Գյուղին հարակից ազատագրված տարածքներում, որոնք սահմանակից են Իրանի Իսլամական Հանրապետությանը, նման միջադեպեր շատ են եղել: Մի անգամ էլ նույնիսկ գյուղից մեկ կով էին տարել։
Սակայն սա առաջին դեպքն է, երբ միանգամից մեծ թվով անասուններ են անհետանում։ Մինչ օրս ոչ ոք դրանց համար չի պատժվել: Օգնության համար նռնաձորցիները դիմել էին ԱԱԾ հրամանատարությանը։
Հունվարի 26-ին կորած 14 կովերից 6-ը սահմանապահները գտել էին Արաքսի ափին: Կովերի պարանոցներին առկա իրանական արտադրության պարանները թույլ են տալիս ենթադրելու, որ հարևան երկրի գյուղացիներն էին տարել անասունները:
Օրերս էլ հայտնաբերվել է ևս մեկը. այն սահմանապահները իրանական կողմում են տեսել: Մնացած յոթի մասին դեռ տեղեկություններ չկան: Նռնաձորցիները հուսով են, որ կգտնեն իրենց կենդանիներին: