Մոլդովան նախատեսում է պատիժ սահմանել՝ տուգանքի կամ չվճարվող հասարակական աշխատանքի տեսքով ստալինյան քաղաքական ճնշումները և արտաքսումները ժխտելու համար: Մոլդովայի խորհրդարանում հայտնել են, որ դա նախատեսում է համապատասխան օրինագիծը, որը մշակել են Լիբերալ կուսակցության խմբակցության պատգամավորները:
Ինչպես հաղորդում է RBK-ն, օրինագծի համաձայն՝ նախկին Մոլդովայի խորհրդային հանրապետությունում ստալինյան արտաքսումների և կոմունիստական քաղաքական ճնշումների ժխտումը հասարակական վայրերում, ինչպես նաև ԶԼՄ-ների հրապարակումներում կպատժվի 20-100 պայմանական միավոր տուգանքով կամ մինչև 60 ժամ հասարակական աշխատանքով:
Լիբերալ կուսակցության ներկայացուցիչները հայտարարել են, որ իրենք նման փոփոխություններ են մշակել՝ պատժելու համար կոմունիստների հանցագործությունները դիտավորյալ կերպով հերքողներին և թույլ չտալու պատմության հետագա կեղծումներ:
ԽՍՀՄ պաշտոնական տվյալներով՝ ներկայիս Մոլդովայի տարածքից 1941-1951 թթ. ընթացքում արտաքսվել է ավելի քան 70 հազար մարդ: Մոլդովացի պատմաբանների տվյալներով՝ այդ թիվը շատ ավելի մեծ է: