Ինչպես հաղորդում է «Ազատություն» ռադիոկայանը, Ռումինիայում գնալով էլ ավելի է սրվում քաղաքական ճգնաժամը։ Երեքշաբթի օրը սենատորները, որոնք ներկայացնում են իշխող Սոցիալ-լիբերալ միությունը, ձայների մեծամասնությամբ պաշտոնանկ են արել երկրի խորհրդարանի ընդդիմադիր խոսնակին։
Նույն օրը Ռումինիայի Սահմանադրական դատարանը հայտարարել է իշխող կուսակցության կողմից դատարանի վրա իրականացվող ճնշումների մասին։ Ավելի վաղ Սոցիալ-լիբերալ միության ներկայացուցիչները հայտարարել էին, որ անհրաժեշտ է փոխել Սահմանադրական դատարանի որոշ անդամների։ Երեկ Ռումինիայի նախագահ Տրայան Բեսեսկուն իր հերթին ասել է, որ քաղաքական ընդդիմախոսները փորձ են անում «հարձակում գործել պետական ինստիտուտների վրա»։
Հիշեցնենք, որ Ռումինիայում արդեն մի քանի ամիս է` լուրջ առճակատում է ընթանում նախագահի և վարչապետ Վիկտոր Պոնտայի միջև։