Ինտերնետային ԶԼՄ-ների փոխանցմամբ՝ Միջերկրական ծովում վարժանքների ընթացքում կործանվել է «Շարլ դե Գոլ» ավիակրի վրայից օդ բարձրացած ֆրանսիական Rafale կործանիչը: Օդաչուն հասցրել է կատապուլտացվել:
Ֆրանսիայի ռազմածովային նավատորմի շտաբի տեղեկացմամբ՝ աղետը տեղի է ունեցել Rafale և F-18 կործանիչների միջև մարտի իմիտացիայի ընթացքում: Օդաչուին ծովից վերցրել է ամերիկյան ուղղաթիռը:
Այժմ Միջերկրական ծովի վարժանքներին մասնակցում են ֆրանսիական և ամերիկյան կործանիչներ:
Ֆրանսիական Rafale կործանիչը համարվում է չորրորդ սերնդի ամենաառաջադեմ ռազմական օդանավերից մեկը: Ֆրանսիան տարեսկզբին Հնդկաստանի ռազմաօդային ուժերին 126 կործանիչ մատակարարելու տենդեր էր շահել: Մասնագետների գնահատմամբ՝ գործարքի արժեքը կկազմի 10,4 մլրդ ԱՄՆ դոլար: Համաձայն հնդկական պայմանագրի՝ Rafale կործանիչներն առաջին անգամ կարտահանվեն այլ երկիր:
