Կես տարի է, ինչ Երևանի բժշկական երեք հաստատություններում Արաբկիր, Նաիրի բժշկական կենտրոններում և Ակնաբուժական կենտրոնում մեկնարկել է համավճարի պիլոտային ծրագիրը. այսօր լրագրողների հետ հանդիպման ժամանակ հայտարարեցին ԱՆ պետական առողջապահական գործակալության պետ Արա Տեր-Գրիգորյանը և ԱՆ աշխատակազմի ղեկավար Սուրեն Քրմոյանը:
Նրանք խոսեցին համավճարի համակարգի մասին. «2010թվականի սեպտեմբերի 27-ի վարչապետի մոտ տեղի ունեցած նիստի ընթացքում քննարկվեց համավճարի ընդլայնման հարցերը: Փետրվարի 1-ից արդեն գործում է համավճարի համակարգը ոչ միայն Երևանում,այլ նաև մարզերում»,- նշեց Տեր Գրիգորյանը:
Նա նշեց նաև, որ բոլոր բուժհաստատությունների հանձնաժողովներն իրավունք ունեն 20 տոկոս զեղչ կատարելու և պետպատվերի իրավունք սահմանելու:
Համավճարը արտոնյալ պայմաններով բժշկական օգնություն և սպասարկում ստանալն է: Առողջապահության նախարարությունն ունի պետական երկու ծրագիր անվճար և արտոնյալ պայմաններով, արտոնյալ պայմանների տարատեսակներից մեկը հենց համավճարն է:
Սուրեն Քրմոյանը հայտարարեց, որ բոլոր բուժհաստատությունների բժիշկներին սպասվում է աշխատավարձի ավելացում. «Օրենքով ամրագրված է որ յուրաքանչյուր բուժհաստատություն պարտավորված է կատարել անհետաձգելի առաջին բուժօգնություն և յուրաքանչյուր հիվանդ, ով դիմում է բուժօգնության, պետք է ստանա բուժօգնություն: Այսուհետ բոլոր բուժհաստատությունները համավճարի դեպքում հիվանդի հետ պայմանագիր կկնքեն:
Համավճարը արտոնյալ պայմաններով բժշկական օգնություն և սպասարկում ստանալն է: Այսինքն մենք ունենք պետական երկու ծրագիր անվճար և արտոնյալ պայմաններով, արտոնյալ պայմանների տարատեսակներից մեկը հենց համավճարն է»,- նշեց Սուրեն Քրմոյանը:
Արա Տեր Գրիգորյանը, օրինակ բերելով, ասաց,որ եթե մարզերում յուրաքանչյուր վիրահատական դեպքի համար վճարում էին 65 հազար դրամ, ապա հիմա համավճարի դեպքում կվճարեն 150-160 հազար, որից պետությունը իր վրա է վերցնում 105 հազարը, և ստացվում է, որ համավճարի դեպքում հիվանդը կվճարի 55 հազար դրամ:
