ՌԴ նախագահ Վլադիմիր Պուտինի նախընտրական խոստումները կպահանջեն բյուջեի հավելյալ ծախսեր ՀՆԱ-ի 2 տոկոսի չափով, ինչը կհանգեցնի հարկերի անխուսափելի աճի: Ինչպես այսօր գրել է «Վեդոմոստին», այս մասին նշված է Bank of America Merrill Lynch (BofA)-ի` ՌԴ-ում 10 տարվա կտրվածքով էկոնոմիկայի զարգացման կանխատեսման մեջ:
Հետազոտության հեղինակների կարծիքով` Առևտրի համաշխարհային կազմակերպություն մտնելով` ՌԴ-ն կմեծացնի հումքային մասնագիտացումը, քանի որ բնական ռեսուրսների մեծամասշտաբ պահուստները Ռուսաստանի ակնհայտ մրցունակային առավելությունն են:
Միևնույն ժամանակ, կառավարությունը պետք է աշխատի պահպանել բալանսավորված բյուջեն 100-115 դոլար` 1 բարել նավթի դիմաց մակարդակում, որպեսզի խուսափի ուժեղ պակասուրդից: Դրա հետ կապված` նավթի վաճառքից ստացված եկամուտները բյուջե կկրճատվեն:
Ռուսաստանը ստիպված է լինելու բախվել աշխատուժի կրճատմանը, ինչը բնորոշ չէ զարգացող երկրների համար:
BofA-ում կարծում են, որ աշխատողների պակասը կհանգեցնի աշխատավարձերի բարձրացման, և արդեն 2020 թ. միջին խավի թիվը կաճի եռակի ու կկազմի 66.7 մլն մարդ: Ու քանի որ հարկերը կբարձրանան, բիզնեսը ստիպված կլինի ակտիվ բարձրացնել աշխատանքի արտադրողականությունը` եկամուտը պահպանելու համար: Դա կհանգեցնի տնտեսության առողջացման:
BofA-ն կանխատեսում է նաև Ռուսաստանի էկոնոմիկայի աճ` տարեկան միջինը 3.9 տոկոս: Ընդ որում` եթե ԿԲ-ի դրամային քաղաքականությունը պահպանվի, ապա ինֆլյացիան բարձր կլինի 4 տոկոսից:
Ներդրումային բանկում նկատում են, որ եթե ներկայիս ռուսական էլիտան ցանկանա իշխանության գլուխ մնալ և 2020 թ. հետո, ապա պետք է տնտեսական բարեփոխումներ իրականացնի: Սակայն, ըստ BofA-ի, նրանց համար վտանգ կներկայացնի ներքին քաղաքականությունը, որի խստացումը կարող է հանգեցնել «ռուսական գարնան»:
