Թիկնապահը կրակելու իրավունք չունի, նույնիսկ օդ՝ նախազգուշական կրակոց արձակելու իրավունք չունի, իրավունք չունի ծեծելու, հարձակվելու և պետք է միայն պաշտպանի: Ինչպես այսօր լրագրողների հետ հանդիպմանը հայտարարեց «Պահապան արծիվ» թիկնապահական ակադեմիայի ղեկավար Արսեն Դավթյանը, կարևոր չէ թիկնապահների քանակը, կարևոր են թիկնապահի անձնական հատկանիշները` խելքը, պատրաստվածությունը, զսպվածությունը:
«Թիկնապահն իրեն վարձակալողի հետ հատուկ պայմանագիր է կնքում, թե որ ժամին պետք է աշխատի, որ ժամերին՝ ոչ: Միայն Հայաստանում թիկնապահը կարող է աշխատել օրը 26 ժամ»,- նշեց Ա. Դավթյանը` հավելելով, որ Հայաստանում առավել ուշադրություն են դարձնում թիկնապահի աժդահա լինելու հանգամանքին: Նա տեղեկացրեց, որ մարդկանց հանդեպ բռնության տարեկան 10-15 դեպք է լինում, և թիկնապահի վարկը գցում են:
Ինչպես ասաց Ա. Դավթյանը, դեռ հայտնի չէ՝ «Հարսնաքարի» դեպքի մասնակիցները թիկնապա՞հ են, թե՞ ոչ:
Դավթյանը նշեց, որ թիկնապահ են նրանք, ովքեր ունեն լիազորագրեր, վկայականներ, իսկ հետաքննությունը կբացահայտի, թե որքանով են նրանք թիկնապահ:
