Պետք է ձևավորվի նոր ուժի կենտրոն, և դրա կազմակերպիչը պետք է լինի Հայ ազգային կոնգրեսը. այսօր լրագրողների հետ հանդիպմանն ասաց ՀԱԿ անդամ Պետրոս Մակեյանը:
«Եթե ՀԱԿ-ը պաշտպանի Վարդան Օսկանյանին, այլևս Կոնգրես չի լինի, բայց ես համաձայն չեմ այն տեսակետին, որ երեկ կայացած ՀԱԿ հանրահավաքի ժամանակ նրա անձի հետ կապված ուղիղ ակնարկներ եղան: Վարդան Օսկանյանը եղել է հարյուրավոր քաղբանտարկյալների գործերի կնքահայրը, սակայն նաև դեմ եմ, որ մարդու վրա գործ սարքեն»,- ասաց նա:
Ասուլիսի մյուս բանախոս՝ ՀՀԿ-ական պատգամավոր Մկրտիչ Մինասյանն էլ իր հերթին նկատեց, որ երեկվա ՀԱԿ հանրահավաքի ժամանակ ՀՀ նախկին արտգործնախարար Վարդան Օսկանյանին որպես ընդդիմության նոր լիդեր նախանշելու ակնարկներ հնչեցին:
Անդրադառնալով կառավարության հնգամյա ծրագրին՝ նա նկատեց, որ այն առաջին հերթին, իսկապես, քաղաքական փաստաթուղթ է:
ՀՀԿ-ական պատգամավորը միաժամանակ չհամաձայնեց լրագրողներից մեկի դիտարկմանը, որ Հայաստանում ինքնասպանությունների թիվն աճել է կառավարության ծրագրի ընդունումից հետո:
Պետրոս Մակեյանն էլ նկատեց, որ ընդունված փաստաթուղթը որևէ աղերս չուներ Հայաստանի հետ:
ՀԱԿ անդամը նաև նշեց, որ ԱԺ մուտք գործած բոլոր քաղաքական ուժերը խորհրդարան են մուտք գործել իշխանության բարի կամքի շնորհիվ: «Իսկ ահա ՀԱԿ-ի մասով իշխանությունը վերջին պահին գրեց 7 տոկոսը՝ վախենալով, որ նա կարող է մարդկանց կրկին փողոց դուրս բերել»:
Մկրտիչ Մինասյանն ի պատասխան Մակեյանի այդ դիտարկմանը՝ նշեց, որ իշխանությունները ոչ մի կուսակցության հանդեպ բարի կամք չեն դրսևորել: «Դա բացառվում է, նման բան անհնար է: Ի՞նչ է, դիտորդնե՞ր չկային, որ մենք 6,99 տոկոսը 7 դարձնեինք»,- հարց հնչեցրեց իշխանական պատգամավորը:
