Իտալիայի ազգային հավաքականի կիսապաշտպան Ռիկարդո Մոնտոլիվոն հայտնել է, որ «Եվրո-2012»-ի կիսաեզրափակիչի Գերմանիայի ընտրանու հետ հանդիպումն իր համար յուրահատուկ է. ֆուտբոլիստը գերմանական արմատներ ունի:
«Միշտ ասել եմ, որ Գերմանիան իմ սրտում է, քանի որ մայրս գերմանուհի է: Մինչև 15 տարեկանը ամռան ամիսներն անցկացրել եմ Գերմանիայում՝ տատիկիս ու պապիկիս մոտ: Հունիսի 28-ին իմ խաղակոշիկների վրա պատկերված կլինեն 2 հավաքականների դրոշները, ինչով հարգանքի տուրք կմատուցեմ ծնողներիս:
Բայց, եթե անկեղծ լինեմ, ես ինձ 90%-ով իտալացի եմ զգում և միայն 10%-ով գերմանացի: Գերմանացի եմ սառնասրտությամբ, ինչը, ցավոք, չօգնեց ինձ դիպուկ իրացնել 11 մետրանոցը, և անսասան բնավորությամբ:
Գերմանիայի ընտրանում կառանձնացնեի Նոյերին ու Օզիլին, որը հիանալի փոխանցումներ է կատարում: Կարծում եմ, Գերմանիան հարգանքով և զգուշավորությամբ կվերաբերվի մեր հավաքականի հետ հանդիպմանը: Միաժամանակ, մեզ բարդ հանդիպում է սպասվում. գերմանացիները ներկայումս հիանալի են խաղում»,- հայտնել է Մոնտոլիվոն իտալացի լրագրողներին:
