ԱՄՆ նախկին պետքարտուղար Քոնդոլիզա Ռայսը լիովին հերքել է առաջիկայում ԱՄՆ-ում կայանալիք համընդհանուր փոխնախագահի ընտրություններում հանրապետական կուսակցության կողմից իր մասնակցության հավանականությունը:
«Ես երբեք դա չեմ անի»,- ասել է նա՝ այսօր CBS-ին տված հարցազրույցում:
Եվ քանի որ հաղորդավարը նրան հարցրել է, թե ինչ կպատասխանի նա, եթե իրեն նման առաջարկ անեն, Ռայսն ասել է. «Ես պնդում եմ, որ դա չեմ անի ոչ մի պարագայում, քանի որ դա, իրոք, ինձ համար չէ: Ես գիտեմ իմ ուժեղ կողմերը, և նահանգապետ Ռոմնին պետք է այնպիսի մարդ գտնի, որը կցանկանա մրցավազքին իր հետ միասին մասնակցել»:
Նախօրեին Ռայսն առաջին անգամ ելույթ ունենալով՝ հայտարարել էր, որ ԱՄՆ-ը կհաղթահարի ներկայիս դժվարություններն՝ ամրապնդելով տնտեսությունն ու ժողովրդավարությունը, իսկ Ռոմնին հիանալի նախագահ կլինի: Դիտորդները գնահատել են նրա այդ վառ ելույթը որպես փոխնախագահի պաշտոնի համար պայքար:
Ինչ վերաբերում է ԱՄՆ արտաքին քաղաքականությանն, ապա այսօր Ռայսը նշել է, որ չի հավատում «հետին շարքերից առաջնորդության» մարտավարությանը, որը ընտրել է ներկայիս կառավարությունը: Ըստ նրա՝ ԱՄՆ-ն ավելի հզոր դեր պետք է խաղա համաշխարհային հարցերում, իսկ Ռոմնին դա հասկանում է:
