Էրեբունի ամրոցում 2008 թվականից կյանքի կոչված հայ-ֆրանսիական համագործակցությունը կշարունակվի 2012-2015 թվականներին` դառնալով պատմամշակութային ժառանգության բնագավառում համագործակցության հաջողված օրինակ: «Էրեբունի» պատմահնագիտական արգելոց-թանգարանից «Առաջին լրատվական»-ին հայտնում են, որ հայ և ֆրանսիացի մասնագետները կշարունակեն միասին բացահայտել ուրարտական քաղաք-ամրոցի մինչ օրս անհայտ էջերը` պատասխանելով ժամանակի ընթացքում ամրոցի ճարտարապետական հորինվածքի կրած փոփոխությունների և հնագիտական գտածոների հետ կապված բազմաթիվ հարցերի:
2012թ. հունիսի 5-ից Էրեբունի ամրոցում վերսկսված պեղումների 1-ին գործաշրջանը կավարտվի հունիսի 30-ին:
Լրատվամիջովների համար արշավախմբի արդյունքները կամփոփվեն «Էրեբունի» պատմահնագիտական արգելոց-թանգարանում 2012թ. հունիսի 28-ին, ժամը` 11:00-ին հրավիրվող մամուլի կոնֆերանսում:
Կոնֆերանսին կմասնակցեն արգելոց-թանգարանի տնօրեն Գագիկ Գյուրջյանը, տնօրենի տեղակալ Արաքսի Մեշինյանը, ֆրանսիական արշավախմբի ղեկավար Ստեֆան Դեշամպը և հնագետ Ֆրանսուա Ֆիշե Դը Կլերֆոնտենը:
