Lragir.am-ը վերջերս տեղեկացրել էր, որ ՀՅԴ Արցախի կառույցում լուրջ դժգոհություններ կան ՀՅԴ ղեկավարների հանդեպ: Բանն այն է, որ ՀՅԴ Արցախի կազմակերպությունը հայտարարել էր, թե նախագահի ընտրությանը պահպանելու է չեզոքություն և չի սատարելու ոչ մի թեկնածուի: Սակայն, բառացիորեն մեկ-երկու օր անց ՀՅԴ Արցախի կազմակերպությունը հայտարարել էր, թե սատարելու է գործող նախագահ Բակո Սահակյանին:
Պարզվում է, շտապ Ղարաբաղ էր մեկնել ՀՅԴ ղեկավարներից Հրանտ Մարգարյանը, և առանց խորհրդակցելու և հաշվի առնելու ՀՅԴ անդամների կարծիքը, գրել ու տարածել այդ հայտարարությունը: ՀՅԴ Արցախի կազմակերպության կոմիտեությունների մեծ մասը դեմ է եղել այդ որոշմանը, իսկ մյուսները հակված են եղել չեզոքություն պահպանելու: Փաստացի, Հրանտ Մարգարյանը միանձնյա է կայացրել այդ որոշումը:
Հրանտ Մարգարյանի կամայական որոշումից հետո Արցախի դաշնակցականները չեն ենթարկվել այդ հայտարարությանը և որոշում են կայացրել աջակցել ԼՂՀ նախագահի մեկ այլ թեկնածուի՝ Արցախի հերոս գեներալ Վիտալի Բալասանյանին: Lragir.am-ի տեղեկություններով, երբ Հրանտ Մարգարյանը չենթարկվողներին առաջարկել է դիմում գրել և դուրս գալ Դաշնակցությունից, վերջիններս նրան են առաջարկել դիմում գրել և հեռանալ:
