Կանադական Research in Motion (RIM) ընկերությունը, որը թողարկում է BlackBerry սմարթֆոնները, դիտարկում է իր բիզնեսը երկու առանձին ընկերությունների բաժանելու հնարավորությունը: Այս մասին հայտնում է Sunday Times-ը՝ առանց նշելու, թե որտեղից է ստացվել տեղեկությունը: RIM-ում այդ տեղեկությունները պաշտոնապես չեն մեկնաբանել:
Ինչպես նշում է պարբերականը, բիզնեսի մասնատման դեպքում RIM-ը կառանձնացնի տեխնիկայի արտադրությունը, իսկ ապագայում հնարավոր է նաև վաճառի: Դրանից հետո RIM-ին կմնան միայն բջջային ծառայությունները:
Որպես այլընտրանքային տարբերակ՝ RIM-ը դիտարակում է իր բիզնեսը միասնական ընկերության մեջ պահելու տարբերակը, որի բաժնետոմսերի մի մեծ փաթեթ կվաճառի խոշոր տեխնոլոգիական կորպորացիայի, ասենք՝ Microsoft-ին: Որպես պոտենցիալ գնորդներ նշվում են Amazon-նն ու Facebookը:
Ինչպես փաստում է The Verge-ը, վերջին մի քանի ամիսներին RIM-ի ղեկավար Տորստեն Հեյնսը բազմիցս հայտարարել է, որ ընկերությունը մտադիր չէ վաճառել իր բաժնետոմսերը կողմնակի ներդրողներին: Ցանկացած դեպքում, ըներության վերակազմակերպման վերջնական ծրագիրը կհրապարակվի օգոստոսի վերջին:
Ավելի վաղ հաղորդվել էր, որ կանադական ընկերությունը որպես բիզնես խորհրդատուներ ներառել է JP Morgan-ի և The Royal Bank of Canada-ի մասնագետներին:
Վերջին մի քանի տարիներին RIM-ը շուկայում իր դիրքերը զգալիորեն զիջել է մրցակիցներին ՝ Apple-ին և Google-ին: Հունիսի սկզբին ընկերությունը իջեցրեց հաջորդ տարում եկամտի վերաբերյալ կանխատեսումը: Դրանից հետո RIM-ի արժեթղթերն էժանացան՝ հասնելով 9-ամյա նվազագույնի՝ 9,66 դոլարի: Պատմական մաքսիմումի (147,55 դոլար. 2008 թվական) հետ համեմատած, ընկերության բաժնետոմսերի գինն ընկել է 93 տոկոսով:
