Ֆուտբոլի Եվրոպայի 2012 թվականի առաջնության քառորդ եզրափակիչում ուժերը չափեցին Իսպանիայի ու Ֆրանսիայի հավաքականները:
Աշխարհի և Եվրոպայի գործող չեմպիոնների հետ խաղում ֆրանսիացիների գլխավոր մարզիչ Լորան Բլանը մի քանի հետաքրքիր որոշումներ էր կայացրել կապված մեկնարկային կազմի հետ: Աջ եզրում գործում էին երկու աջ պաշտպաններ` Ռևեյերն ու Դեբյուշին¬` փորձելով վերահսկել Անդրես Ինյեստայի ու Խորդի Ալբայի տեղաշարժը, ովքեր հիանալի են համագործակցում ձախ եզրում: Պահեստայինների նստարանին էր մնացել Նասրին:
Դել Բոսկեն պահեստայինների նստարանին էր թողել Ֆերնանդո Տորեսին: Իսպանացիներն, ինչպես մեկնարկային խաղում, հանդես էին գալիս առանց ընդգծված կենտրոնական հարձակվողի, իսկ այդ դիրքը պետք է զբաղեցներ Սեսկ Ֆաբրեգասը:
Խաղի մեկնարկում լուրջ պայքար էր ծավալվել խաղադաշտի կենտրոնում, որն աստիճանաբար տիրում էր Իսպանիայի ընտրանին: Մեկնարկային 10 րոպեեներն անցան առանց վտանգավոր պահերի: Իսպանացիների հարձակման ձախ եզրը փակել էին Ռեվեյերն ու Դեբյուշին, իսկ դել Բոսկեին սաներն ավելի շատ գրոհում էին աջ եզրով, որտեղ ժամանակ առ ժամանակ հայտնվում էին Ֆաբրեգասն ու Սիլվան:
19-րդ րոպեին բացվեց հանդիպման հաշիվը, իսկ գոլը ծնվեց… ձախ եզրից: Ալբային անհատական անցումից ու դիպուկ փոխանցումից հետո իր հավաքականի կազմում 100-րդ խաղն անցկացնող Խաբի Ալոնսոն գլխի հարվածով գրավեց Ուգո Լյորիսի պաշտպանած դարպասը:
Բաց թողած գոլից հետո նույնպես Բլանի սաները չէին կարողանում կազմակերպել խաղն առջևի գծում: Իսպանացիներն ամբողջովին տիրել էին խաղադաշտի կենտրոնը: Պասիվ էր Կարիմ Բենզեման, բայց ի՞նչ կարող էր անել Մադրիդի «Ռեալ»-ի հարձակվողը, եթե փոխանցում չէր ստանում և կարծես դուրս էր մնացել խաղից:
30-րդ րոպեին Կասիլյասի պաշտպանած դարպասին տուգանայինից հարվածեց Կաբայը, սակայն իսպանացիների ավագի համար այն ետ մղելը բարդ գործ չէր:
Լուրջ հսկողության տակ գտնվող Անդրես Ինյեստան լքեց ձախ եզրն ու տեղաշարժվեց աջ, որտեղ հենց առաջին փորձից Ֆաբրեգասի հետ կոմբինացիայի արդյունքում հայտնվեց հարվածային դիրքում, սակայն Ռամին փակեց հարվածը:
Երկրորդ խաղակեսում խաղի պատկերը չփոխվեց: Իսպանացիները վերահսկում էին գնդակի տեղաշարժը, իսկ այն տիրելու եզակի դեպքերում ֆրանսաիցիները չէին կարողանում գրոհի շարունակություն գտնել: Բացի այն, որ Իշիսպանացիները քանակական առավելություն ունեին խաղադաշտի կենտրոնական հատվածում, նաև գրագետ տեղաշարժեր էին կատարում առանց գնդակի: Իսպանիայի ընտրանին տարերքի մեջ էր…
65-րդ րոպեին Դեբյուշիի ու Մալուդայի փոխարեն խաղադաշտ դուրս եկան Նասրին ու Մենեզը: Բլանը թեթևացրեց պաշտպանության աջ եզրը` ուժեղացնելով հարձակման գիծը: դել Բոսկեն անմիջապես նկատեց դա: Դավիդ Սիլվային փոխարինած Պեդրոն, մտնելով խաղադաշտ, անմիջապես մարզչի հրահանգը փոխանցեց Ինյեստային` վերջինիս հետ կատարելով դիրքային փոփոխություն. Անդրեսը զբաղեցրեց Սիլվայի դիրքը: Խորամանկ դել Բոսկեն նկատել էր, որ պաշտպանության աջ եզրում մնացել էր միայն ոչ այդքան հաջող գործող Ռեվեյերը, և թարմ ուժերով խաղադաշտ մտած Պեդրոյին հրահանգել էր գործել ձախ եզրում: 67-րդ րոպեին Ֆաբրեգասին փոխարինեց Տորեսը: Րոպեներ անց Պեդրո-Տորես զույգեը կարող էր կազմակերպել իսպանացիների երկրորդ գոլը, սակայն «Բարսելոնա»-ի ֆուտբոլիստի փոխանցումը մեծ դժվարությամբ փակեցին պաշտպանները:
դել Բոսկեն գուշակել էր… 90-րդ րոպեին Ռեվեյերը սեփական տուգանային հրապարակի մատույցներում խախտեց խաղի կանոնները Պեդրոյի նկատմամբ: Գնադկին մոտեցավ Խաբի Ալոնսոն և… 2:0: Իսպանացի մասնագետը հերթական անգամ փայլեց:
Այսպիսով` կիսաեզրափակիչում Իսպանիայի ազգային հավաքականն իր ուժերը կչափի Պորտուգալիայի ընտրանու հետ:
