Հայաստանի «Առիթմոլոգիական Սրտաբանական Կենտրոն» ՍՊԸ-ն դատական հայց է ներկայացրել News.am լրատվական կայքի դեմ 2010թ. նոյեմբերի 23-ին տեղադրված հոդվածի կապակցությամբ: Հիշեցնենք, որ հոդվածում ՀՀ քաղաքացի Հովհաննես Կաթրջյանը մեղադրել էր բժշկական կենտրոնին իրեն խաբելու և 10 տարի շահագործման ժամկետով էլեկտրոկարդիոխթանիչի փոխարեն վիրահատությամբ մեկ այլ, էժանագին սարք տեղադրելու մեջ:
«Առիթմոլոգիական Սրտաբանական Կենտրոն»-ի ներկայացուցիչ Մուրադ Ասրյանը նշում է, որ այդ հոդվածով վնաս է պատճառվել ընկերության պատվին, արժանապատվությանը և գործարար համբավին. «Այդ հոդվածն իր մեջ զրպարտություն է պարունակում, և ընկերությունը որոշել է իր իրավունքները պաշտպանել դատական կարգով»: Նշենք, որ հայցվոր կողմը պահանջում է պատասխանողից տպագրել հերքում և օրենքով նախատեսված դրամական փոխհատուցում` նվազագույն աշխատավարձի 2000-ապատիկի չափով:
Ի դեպ, ՀՀ Քաղաքացիական օրենսգրքի 19-րդ հոդվածում նշված է, որ վիրավորանքը խոսքի, պատկերի, ձայնի, նշանի կամ այլ միջոցով պատիվը, արժանապատվությունը կամ գործարար համբավը արատավորելու նպատակով կատարված հրապարակային արտահայտությունն է: Հրապարակային արտահայտությունը տվյալ իրավիճակում և իր բովանդակությամբ կարող է չհամարվել վիրավորանք, եթե այն հիմնված է ստույգ փաստերի վրա (բացառությամբ բնական արատների) կամ պայմանավորված է գերակա հանրային շահով: Իսկ զրպարտությունը` անձի վերաբերյալ այնպիսի փաստացի տվյալներ (statement of fact) հրապարակային ներկայացնելն է, որոնք չեն համապատասխանում իրականությանը և արատավորում են նրա պատիվը, արժանապատվությունը կամ գործարար համբավը:
Ասրյանը նշեց, որ ինքը Կենտրոն և Նորք-Մարաշ վարչական շրջանների ընդհանուր իրավասության դատարան է դիմել 2010թ. դեկտեմբերի 22-ին և քանի որ ըստ օրենքի դատական հայց հնարավոր է ներկայացնել հոդվածը տպագրելուց հետո մեկ ամիս ժամկետում, ապա Ասրյանը հնարավորություն չի ունեցել ճշտելու, թե որ իրավաբանական անձն է ներկայացնում News.am լրատվական կայքը:
Ասրյանը նշեց, որ ինքը լրատվական կայքից փորձել է ճշտել, թե որ իրավաբանական անձն է այն ներկայացնում, սակայն իրեն չեն պատասխանել և ընդամենը նշել են, թե իրենք կարող են հերքում տպագրել: Մուրադ Ասրյանի խոսքերով, հերքում տպագրելն այդ պահին արդեն անիմաստ էր, քանզի ընկերության արժանապատվությունն ու գործարար համբավը արդեն արատավորված էր, և դժվար թե հերքումը կարողանար ընթերցողներին հակառակն ապացուցել, ավելին, ըստ օրենքի, եթե հերքման պահանջ է ներկայացվում, ապա վնասի հատուցման պահանջ ներկայացնելու իրավունք այլևս հնարավոր չէ ներկայացնել:
Պատասխանող կողմի` «Մեդիա Կոնսալտ» ՍՊԸ-ի իրավապաշտպան Արամազդ Կիվիրյանն էլ մեզ հետ զրույցում ասաց, որ իրենք պարտավոր չէին որևէ մեկին ինֆորմացիա տալու, այլ փաստաբանը պարտավոր էր օրենքով նախատեսված կարգով ճշտելու, թե ով է հանդիսանում իրավաբանական անձը, որին պատկանում է լրատվական գործակալությունը. «Դատական նիստի ժամանակ հայցվոր կողմը պատճառաբանեց, թե ժամանակ չի ունեցել, չի ճշտել, դա իր պրոբլեմն է և թող բարի լիներ ճշտեր, պատասխանողը չէ, որ պիտի ներկայացնի համապատասխան տվյալներ, հայցվորն է պատասխանատու իր հայցադիմումում տեղ գտած փաստական հիմքերը ներկայացնելու համար»:
Մուրադ Ասրյանի խոսքերով, փետրվարի 4-ին կայացած դատական նիստի ընթացքում News.am-ը ներկայացնող «Մեդիա Կոնսալտ» ՍՊԸ-ի ներկայացուցիչները «շոու են սարքել», մասնավորապես Դիանա Գրիգորյանը պատմել է, թե ինչ գիտելիքներ է ինքը ստացել համալսարանի առաջին կուրսում: «Իրավաբանական անձը ճշտելու համար ես պետք է հարցում ուղարկեի, ինչին կպատասխանեին 5-օրյա ժամկետում, իսկ ես ժամանակ չէի ունենա հայցադիմում ներկայացնելու, ես ստիպված զանգահարել եմ խմբագրություն, որտեղ էլ ինձ չեն պատասխանել: Ես ստիպված որպես պատասխանող կողմ ներգրավեցի News.am լրատվական գործակալությանը` ակնկալելով, որ դատական նիստին կներկայանա այն իրավաբանական անձի ներկայացուցիչը, որին պատկանում է լրատվական գործակալությունը: Դատարանի դահլիճում ես արդեն հայցը ներկայացրի ընդդեմ «Մեդիա Կոնսալտ» ՍՊԸ-ի, որի ներկայացուցիչները, սակայն, պատասխանի փոխարեն, սկսեցին իրենց PR-շոուն»,- պատմեց Ասրյանը:
Փաստաբան Ասրյանը տեղեկացրեց, որ ինքը միջնորդություն է խնդրել դատարանից, պատասխանող կողմին ճիշտ նշելու համար և ամենայն հավանականությամբ վաղը հայցը կներկայացվի դատարան: «News.am-ի հրապարակումը ցույց է տալիս, որ ցանկացած լրատվական գործակալություն կարող է միակողմանիորեն ներկայացնել փաստերը: Եթե լրատվամիջոցը խոսում է խոսքի ազատությունից, ապա դրանով չպիտի խախտի այլ սուբյեկտների իրավունքները: Ավելին, եթե իրենք խոսում են խոսքի ազատությունից, ապա առաջինը իրենք են խախտել դա` չնշելով, թե ում է պատկանում կայքը և իրենց հրապարակման մեջ ներկայացնելով միակողմանի ինֆորմացիա: Հայցը ակնհայտ հիմնավոր է և պետք է բավարարվի»,- ասաց Մուրադ Ասրյանը:
Արամազդ Կիվիրյանն էլ նշեց, որ նույնիսկ այն գործերում, երբ իրավապաշտպանը համոզված է, որ հօգուտ իրեն է լինելու գործը, պետք չի գուշակություններ անել և ասել, թե 100 տոկոսով կհաղթի. «Ես չեմ հասկանում հայցվոր կողմի մոտեցումը, թե հայցը կբավարարվի: Դա խոսում է մի բանի մասին, որ իրենք համոզված են, որ Հայաստանում խոսքի ազատությունը սահմանափակված է: Ես կարող եմ հակառակն ասել, որ իրենց ներկայացրած հայցադիմումը պետք է մերժվի, քանզի այն չունի որևիցե իրավական և փաստական հիմք: Եթե մենք իրավական պետություն ունենք, ապա հայցվորի հայցադիմումը ակնհայտ պետք է մերժվի»: Կիվիրյանի խոսքերով, կայքի տպագրած հոդվածում զրպարտություն և վիրավորանք պարունակող որևէ բան չկա, քանզի հոդվածում մեջբերված է սրտաբանական կենտրոնից դժգոհող քաղաքացու խոսքերը: Արամազդ Կիվիրյանը նշեց, որ News.am-ի թղթակիցը հարցազրույց է խնդրել «Առիթմոլոգիական Սրտաբանական Կենտրոն»-ի տնօրենից, սակայն վերջինս հրաժարվել է որևէ մեկնաբանություն տալուց:
Սրտաբանական կենտրոնի փաստաբան Մուրադ Ասրյանն էլ նշում է, թե կենտրոնի տնօրենը ամենևին չի հրաժարվել մեկնաբանությունից, այլ ընդհակառակը` թղթակցին հրավիրել է իր մոտ հարցազրույցի:
Ասրյանը նաև հավելեց, որ անիմաստ է այս ամենին քաղաքական ենթատեքստ տալը, միայն նրա համար, որ «Առիթմոլոգիական Սրտաբանական Կենտրոն»-ը գտնվում է «Էրեբունի» բժշկական կենտրոնում: Ասրյանի խոսքերով, կենտրոնն այնտեղ պարզապես վարձակալում է:
Նշենք, որ «Առիթմոլոգիական Սրտաբանական Կենտրոն» ՍՊԸ-ն դատական հայց է ներկայացրել նաև «Առավոտ» օրաթերթի դեմ, և դատական պրոցեսը ընթանում է:
Անժելա Խաչատրյան, «Ժամանակ» օրաթերթ