Facebook սոցիալական ցանցը առաջին անգամ սկսում է գովազդային «Հովանավորված պատմությունները» տեղադրել կողմնակի օնլայն ռեսուրսում՝ խաղեր մշակող Zynga ընկերության կայքում։ Այս մասին հաղորդում է CNET News-ը՝ հղում անելով Facebook-ի տարածած հաղորդագրությանը։ Այս կերպ Facebook-ը իր կայքից դուրս փորձում է ընդլայնել գովազդային հարթակը։
Ria.ru-ի փոխանցմամբ՝ Zynga-ն հանդիսանում է սոցիալական ցանցի խաղերի խոշորագույն մշակողը և իր եկամուտների մեծ մասը ստանում էր սոցցանցից։ Այս տարվա մարտին ընկերությունը, փորձելով նվազեցնել ֆինանսական կախվածությունը Facebook-ից, ներկայացրել է օնլայն հարթակ, որտեղ տեղադրված են նրա խաղերն ու այլ մշակողների խաղեր։ Zynga-ի կայքում օգտատերերը կարող են խաղալ և միաժամանակ շփվել մյուս խաղացողների հետ։
Ներկայում Facebook-ի գլխավոր նպատակն է ներդրողներին ապացուցել իր բիզնես մոդելի շահութաբերությունը։ Ներդրողները հիասթափություն են ապրել սոցցանցի բաժնետոմսերի անկումից, որի պատճառը տեխնիկական խոտանի պատճառով բորսային շուկա դուրս գալու մեկնարկի կես ժամով ուշացումն էր և կանխատեսումներն այն մասին, որ ցանցի շահութաբերությունը կնվազի։
Facebook-ի բաժնետոմսերի գինը ուրբաթ օրվա տվյալներով աճել է 3,8%-ով՝ հասնելով 33,05 դոլարի։ 2011 թվականին սոցցանցի եկամուտը կազմել է 3,7 միլիարդ դոլար, ընդ որում՝ մեծ մասը ստացվել է գովազդից։
