Այսօր անվտանգ ինտերնետի միջազգային օրն է, որի շրջանակներում անցկացվել է «Երեխաների առցանց անվտանգություն» միջոցառումը:
Այսօր միջոցառման շրջանակներում ամփոփվեց «Ինտերնետը, դրա առավելությունները, վտանգներն ու անվտանգ օգտագործումն իմ աչքերում» թեմայով աշակերտական մրցույթը: Հայաստանի տարբեր մարզերից մոտ 100 երեխա մրցույթին ներկայացրել էր 60 տեսահոլովակ:
«Երեխաների առցանց անվտանգություն» միջոցառումը համաշխարհային ծրագիր է, որի նպատակն է դպրոցականներին մասնակից դարձնել տեղեկատվական տեխնոլոգիական զարգացումներին և բացատրել ինտերնետից անվտանգ օգտվելու կանոններն ու անհրաժեշտությունը:
Հայաստանում այս միջոցառումն անցկացվում է «Մայքրոսոֆթ» ընկերության հայաստանյան գրասենյակի և «Վորլդ Վիժն Հայաստան» բարեգործական կազմակերպության համատեղ ուժերով:
«Այս տարվա միջոցառման կարգախոսն է` «Սա խաղ չէ, սա կյանք է»: Այսօր դժվար է ժամանակակից կյանքը պատկերացնել առանց ինտերնետի, որն իհարկե իր մեջ պարունակում է նաև բազմաթիվ վտանգներ: Պետք է պարզապես պահպանել անվտանգության կանոնները: Պետք է ընդգրկվեն տարբեր կազմակերպություններ և միայն համագործակցության շնորհիվ կարելի է արդյունքների հասնել: Մենք չեն եզրափակվի միայն մեկ օրով, հայտարարվել է մեկամսյակ, որի ընթացքում այլ միջոցառումներ ևս կանցկացվեն»,- նշեց «Մայքրոսոֆթ» ընկերության հայաստանյան գրասենյակի տնօրեն Գրիգոր Բարսեղյանը:
Ծրագիրը ֆինանսավորվում է «Վորլդ Վիժն Ավստրիա» կազմակերպության կողմից: