Los Angeles Times-ը, մեջբերելով Նյու Յորքի համալսարանի նոր հետազոտության արդյունքները, հայտնում է, որ սոցիալական մեդիայում ամենաազդեցիկը ամուսնացած մարդիկ են։ Հետազոտողներն եկել են նաև այն եզրակացության, որ Facebook սոցիալական ցանցում տղամարդիկ ավելի ազդեցիկ են, քան կանայք։
Հետազոտողներն ուսումնասիրել են 1,3 մլն օգտատերերի և պարզել, թե ով ում վրա է ազդում։ Երբ օգտատերը գնահատական է տալիս որևէ բանի, Facebook-ն այս մասին տեղեկացում է տվյալ օգտատիրոջ ընկերներին։
Գիտնականները հետևել են, թե ում «խորհուրդ տված» հավելվածներն են օգտագործել ընկերները։ 30-ից բարձր տարիք ունեցող ամուսնացած տղամարդկանց խորհրդով են ամենից շատն օգտագործվել հավելվածները։
Հետազոտության նպատակն է գտնել ազդեցիկ մարդկանց, որոնք էլ կդառնան գովազդի ուղղման թիրախ։ Տարիքով մեծ, ամուսնացած տղամարդիկ ամենաազդեցիկն են, սակայն հետազոտողները չեն ընդհանրացնում արդյունքները՝ հայտնելով, որ դժվար թե նրանք նույն կերպ կարողանան տարածել իրենց ազդեցությունը, երբ խոսքը վերաբերի Դիսնեյ լենդին կամ Ջասթին Բիբերին։
