Իրանական ILNA լրատվական գործակալության փոխանցմամբ՝ Իրանի Կենտրոնական բանկի կայքը ենթարկվել է կիբեր հարձակման, որը վնասել է բանկի սերվերը: Կենտրոնական բանկի կայքն այցելության համար անհասանելի է հունիսի 19-ից:
Իրանի հետախուզության նախարար Հեյդար Մոսլեհին հայտարարել է, որ թշնամիները հունիսի 18-19-ը Մոսկվայում անցկացված «միջուկային» բանակցություններից հետո խստացրել են իրենց կիբեր հարձակումները: Մոսլեհին, սակայն, չի հաստատել, որ Իրանի Կենտրոնական բանկի կայքը ենթարկվել է կիբեր հարձակման:
Բանկը նույնպես չի հաստատել այդ տեղեկատվությունը, սական դեռևս հունիսի 11-ին Կենտրոնական բանկի ղեկավար Մահմուդ Բահմանին հայտարարել էր, որ օրական բանկի կայքի վրա իրականացվում է կիբեր հարձակման մինչև 250 փորձ: Այս առավոտ Կենտրոնական բանկի կայքը վերստին սկսել է գործել:
