Հունիսի 17-ին «Հարսնաքար» ռեստորանային համալիրում դաժան ծեծի ենթարկված Կենտրոնական կլինիկական զինվորական հոսպիտալի ԼՈՌ բաժանմունքի ղեկավար, 35-ամյա մայոր Վահե Ավետյանի վիճակը շարունակում է մնալ ծայրահեղ ծանր: Այս մասին «Առաջին լրատվական»-ին տեղեկացրին ՊՆ հասարակայնության հետ կապերի բաժնից: Ըստ ՊՆ աշխատակցի՝ երեկվանից ոչինչ չի փոխվել, բժշկական միջամտություն չի եղել: «Բոլոր համապատասխան բուժումներն արված են»,- ասացին ՊՆ-ից:
Նշենք, որ դաժան ծեծի արդյունքում Վահե Ավետյանի մոտ առաջացել էր ուղեղի հեմատոմա, ինչի արդյունքում գլխուղեղի մի կիսագնդի մի մասը տեղափոխվել է մյուս կիսագնդի մեջ: Վիրահատությունը կատարած բժիշկը` նեյրովիրաբուժական բաժանմունքի պետ Արման Հակոբյանը, որը Ավետյանի հետ նույն հոսպիտալում էր աշխատել, ավելի վաղ ասել էր, որ վիրահատությամբ փորձել են կանխել ուղեղի շարունակվող այտուցումը: Երեկ նաև տեղեկություններ տարածվեցին, որ Վահե Ավետյանի ուղեղում նոր հեմատոմա է առաջացել:
Հիշեցնենք, որ հունիսի 17-ին ԱԺ ՀՀԿ-ական պատգամավոր Ռուբեն Հայրապետյանին պատկանող «Հարսնաքար» ռեստորանային համալիրում անվտանգության աշխատակիցները դաժան ծեծի էին ենթարկել զինվորական հոսպիտալի նեյրովիրաբուժության բաժանմունքի միկրովիրաբույժ Արտակ Բայադյանին, Կենտրոնական կլինիկական զինվորական հոսպիտալի ԼՈՌ բաժանմունքի ղեկավար, մայոր Վահե Ավետյանին և կլինիկական օրդինատոր, ավագ լեյտենանտ Գարիկ Սողոմոնյանին: Միջադեպի առնչությամբ հարուցվել է քրեական գործ, կան ձերբակալվածներ:
