Այսօր Փախստականների միջազգային օրն է: Հայաստանում փախստականների իրավիճակից խոսեց Ադրբեջանահայերի ասամբլեայի նախագահ, ադրբեջանագետ Գրիգորի Այվազյանը:
Վերհիշելով պատմությունը` նա ասաց, որ ինչպես 1918 թվականին, այնպես էլ 1988 թվականին Հայաստանը հանդիպեց փախստականների իսկական հեղեղի: Նրա խոսքով` այդ փախստականները պարտք ու պահանջ չունեն Հայաստանից, որովհետև նրանց բոլոր տառապանքների միակ մեղավորը Ադրբեջանի ղեկավարությունն է, որն իսկական ցեղասպանություն իրագործեց սեփական հայ համաքաղաքացիների նկատմամբ:
Ուստի, ըստ բանախոսի, երկրաշարժի արհավիրքից հետո պատերազմի մեջ գտնվող Հայաստանում արվեց հնարավորը ավելի քան կես միլիոն փախստականներին ընդունելու համար, սակայն, նրա համոզմամբ, այդ ամենն անբավարար էր ցեղասպանություն վերապրած մարդկանց սփոփելու ու նրանց առաջնահերթ կարիքները հոգալու համար:
«Նրանց իրավիճակը օրհասական է մնում մինչ օրս՝ չնայած տարիների ընթացքում փախստականների բացարձակ թիվը Հայաստանում նվազել է, նրանց տոկոսային հարաբերակցությունը չի փոխվել և կազմում է ՀՀ ընդհանուր բնակչության ավելի քան 10%-ը: Այս ցուցանիշով Հայաստանը ոչ միայն Հարավային Կովկասում, այլև ողջ աշխարհում է առաջնային տեղերից մեկը զբաղեցնում»,- նկատեց ադրբեջանագետը:
Անդրադառնալով փախստականների հիմնախնդիրներին Հայաստանում` նա ասաց, որ դրանք երեքն են` քաղաքական, սոցիալ-տնտեսական և իրավական:
Բանախոսի կարծիքով` քաղաքական հիմնախնդիր է ադրբեջանահայերի շահերի ոչ բավարար ներկայացվածությունը Ղարաբաղյան հակամարտության բանակցային գործընթացում և վարչական կառույցներում: Իրավական հիմնախնդիր է, ըստ նրա, կարգավիճակի հետ կապված խնդիրները, որոնց շուրջ, իհարկե, շատ հաճախ լինում են տարակարծություններ, ինչն այս մարդկանց կյանքում լրացուցիչ խնդիրներ է հարուցում: Իսկ սոցիալ-տնտեսական հիմնախնդիրը, բանախոսի խոսքով, հիմնականում բնակարանային հարցն է:
«Փաստորեն, մարդիկ 20 տարուց ի վեր բնակվում են անմարդկային պայմաններում: Խոսվում է, որ այդ հիմնախնդրի լուծման համար 50 մլն դոլարին համարժեք դրամ է պետք, և, բնականաբար, ծիծաղելի է խոսել այդ գումարը չկարողանալ գտնելու մասին: Ծիծաղելի է ասել նաև, թե ադրբեջանահայերը պատրաստվում են Ղարաբաղում կառուցել ինչ-որ քաղաք և 3 մլրդ դոլար ներգրավել դրա համար: Դա անլուրջ է և չի բխում ադրբեջանահայության և՛ հնարավորություններից, և՛ իրավիճակից»,- նշեց բանախոսը:
