Թուրքական Beyazgazete թերթի փոխանցմամբ՝ Թուրքիայի 8-րդ նախագահ Թուրգութ Օզալին սպանողը գտնվում է Ադրբեջանում: Այս կապակցությամբ թերթը գրում է. «Դեռևս 1998 թվականին 34 TC 245 պետհամարանիշ ունեցող մեքենայով Թուրգութ Օզալի կնոջ՝ Սեմրա Օզալի մոտ է եկել ոմն Շահրիյար Պուրնովրուզ, սակայն Օզալի այրին տանը չի եղել:
Նա հանգուցյալ նախարարի կնոջ թիկնապահին խնդրել է Սեմրա Օզալին հանձնել մի գրություն, որի վրա նշված է եղել հետևյալը. «Թուրգութ Օզալը սպանվել է Glikonorinaid պրեպարատով: Նրա մարդասպանը գտնվում է Ադրբեջանում: Նրա անունն է Հասան Ալիօղլու»: Պուրնովրուզը գրության մեջ թողել է այն հյուրանոցի հասցեն, ուր ինքն իջևանել է:
Դրանից հետո Սեմրա Օզալը մարդիկ է ուղարկում հյուրանոց՝ հանդիպելու Շահրիյարի հետ, սակայն նա հյուրանոցում չի եղել: Թուրք սահմանապահները հայտնել են, որ այդպիսի անունով մարդ մուտք չի գործել երկիր: Ավելին՝ իրավապահներին ընդհանրապես չի հաջողվում հայտնաբերել վերոնշյալ պետհամարանիշով մեքենա:
Այս ամենի հետ մեկտեղ, Սեմրա Օզալի թիկնապահի մոտ հայտնաբերվել է Շահրիյար Պուրնովրուզի անձնագրի ֆոտոպատճենը: Թիկնապահի խոսքերով՝ ինքը դեռ այն ժամանակ է այդ ֆոտոպատճենը ներկայացրել հատուկ ծառայություններին, սակայն ներկայումս չի հիշում, թե կոնկրետ ում է հանձնել այդ հանցանշանը»:
Հիշեցնենք, որ Թուրգութ Օզալը Թուրքիայի նախագահ է եղել 1989-1993 թվականներին: Նա մահացել է 1993 թվականի ապրիլի 17-ին: Կասկածներ կան, որ նրան թունավորել են լիմոնադով, և որ նրա թունավորման մեջ իրենց մասնակցությունն են ունեցել Թուրքիայի հատուկ ծառայությունները:
Թուրքիայի ներկայիս նախագահ Աբդուլլահ Գյուլը 2010 թվականի հոկտեմբերի 1-ին իրեն կից Պետական վերահսկիչ խորհրդին հրամայել էր հետազոտել Օզալի մահվան հանգամանքները: Այդ խորհուրդն այժմ եկել է այն եզրահանգման, որ Օզալի մահը վրա է հասել կասկածելի հանգամանքներում, ինչի համար էլ անհրաժեշտ է բացել նրա գերեզմանը:
