Էդմոն Մարուքյանը կառավարության ծրագրի վերաբերյալ իր որոշումը կկայացնի կառավարության հարցուպատասխանի ժամանակ: Այսօր «Առաջին լրատվական»-ի հետ զրույցում այս մասին ասաց անկուսակցական պատգամավոր Էդմոն Մարուքյանը` պատասխանելով հարցին, թե ինչպես է քվեարկելու կառավարության ծրագիրը ներկայացման ժամանակ:
Էդմոն Մարուքյանն ասաց, որ կառավարության ծրագիրն ուսումնասիրել է և շարունակում է ուսումնասիրել, իսկ այսօր ԱԺ-ն ստացել է Կառավարության ծրագրի վերջնական տարբերակը: Էդմոն Մարուքյանի գնահատմամբ` կառավարության ծրագրում ընդհանուր դրական դրույթներ շատ կան:
«Միակ մտահոգությունս այն է, որ դրանց իրականացման մեխանիզմները հստակ չեն: Կարծում եմ`վարչապետի հետ հարցուպատասխան կծավալվի և այդ հարցերը պարզ կդառնան:
Ծրագրում դրույթ կա, որ յուրաքանչյուր առաջին դասարանի աշակերտի անվճար տրամադրվելու է համակարգիչ, սակայն սա ինչ մեխանիզմով և երբ է արվելու, ինչ հնարավորություններ կան սրա համար. հստակեցման կարք կա:
Նշվում է նաև սոցիալապես անապահով խավի ընտանիքների ուսանողների համար կրթությունը հասանելի դարձնելու նպատակով անվճար կրթություն ապահովելու մասին, սակայն իրականացման մեխանիզմների հստակեցման կարիք կա նաև այս դեպքում ևս:
Կարծում եմ, որ ծրագրի ներկայացման ժամանակ պետք է որ վարչապետի կողմից բացվեն և մանրամասն ներկայացվեն»,- պարզաբանեց անկախ պատգամավորը` հավելելով, որ ծրագրում հիմնական ուղղություններն ու դրույթներն են, բայց դրանց իրականացման մեխանիզմները միշտ չէ, որ ցույց են տրված:
Նրա խոսքով` իր վերջնական դիրքորոշումը, այսինքն` ծրագրին դեմ կամ կողմ քվեարկելու որոշումը կկայացնի կառավարության հարցուպատասխանից հետո, պետք է դիտարկի, թե մյուս ուժերը քննադատում են ծրագիրը, ի՞նչն են քննադատում, այսինքն` ինչն է քննադատության հիմնական թիրախը դառնալու: Մարուքյանի համոզմամբ` հետաքրքրական և որոշիչ կլինի նաև կառավարության պատասխանը:
Հիշեցնենք, որ վաղը ԱԺ արտահերթ նիստի ժամանակ ՀՀ կառավարությունը կներկայացնի կառավարության ծրագիրը:
