Կիրակի օրը Երևանի «Հարսանաքար» ռեստորանային համալիրում դաժան ծեծի են ենթարկվել Կենտրոնական կլինիկական զինվորական հոսպիտալի «Քիթ, կոկորդ, ականջ» բաժանմունքի պետ, մայոր Վահե Ավետյանը և նույն հոսպիտալի միկրովիրաբույժ, կապիտան Արտակ Բայադյանը:
Ինչպես այսօր «Ազատություն» ռադիոկայանին փոխանցել է հոսպիտալի վերակենդանացման բաժնի պետ, բուժծառայության փոխգնդապետ Հայկ Անտոնյանը, ծեծի ենթարկված 35-ամյա Վահե Ավետյանը կիրակի երեկոյան հիվանդանոց է տեղափոխվել ծայրահեղ ծանր վիճակում: Նրա ուղեղում առաջացել է հեմատոմա, որի արդյունքում գլխուղեղի մի կիսագունդը որոշ չափով տեղափոխվել է մյուս կիսագնդի մեջ:
«Ծանր, փակ գանգուղեղային տրավմա էր, գլխուղեղի սալջարդ, հեմատոմա, գլխուղեղի դիսլոկացիա` մոտավորապես 3-4 աստիճան, մի կիսագունդը թեքվել էր դեպի մյուս կիսագնդի մեջ», – ծեծի ենթարկված Ավետյանի վիճակը նկարագրել է բժիշկը` շարունակելով. – «Արագ տեղափոխվել է վիրահատարան, կատարվել է վիրահատություն, սակայն ծայրահեղ ծանր վիճակը դեռ պահպանվում է: Առավոտյան նորից կատարվել է համակարգչային տոմոգրաֆիա, ունենք լուրջ խնդիրներ: Ինձ թվում է, դա հենց ուժեղ հարվածի արդյունք է: Կյանքին բավականին լուրջ վտանգ է սպառնում: Ուղղակի չեմ կարողանում խոսքեր գտնել. մարդիկ կարող են իրար չհասկանալ, կարող են վեճի բռնվել, բայց այս աստիճանի հարվածներ, ես չեմ պատկերացնում…»:
Ավետյանի ազգականը` Էդգար Նիկոյանը, «Ազատություն» ռադիոկայանի հետ զրույցում պատմել է, որ ներկա է եղել երեկվա միջադեպին: Նրա փոխանցմամբ` իրենք «Հարսնաքար» ռեստորանային համալիրում խնջույքի են եղել, այնուհետև մատուցողի հետ ինչ-որ թեթև վեճ է եղել, որն արդեն ռեստորանի բակում վերաճել է ծեծկռտուքի: Նիկոյանը ասաց` բակում 10-15 հոգով են ծեծի ենթարկել Ավետյանին: Նա ենթադրում էր, որ դրանք ռեստորանի աշխատակիցներն են: Նիկոյանը ասում է` ծեծկռտուքի պատճառնեը իրենց համար անհասկանալի են. իրենք ոչ մեկին չեն վիրավորել և այդպես էլ չեն հասկանում, թե ինչու այս ամենը տեղի ունեցավ:
Վերակենդանացման բաժանմունքում է գտնվում նաև ծեծի ենթարկված մյուս բժիշկը` Արտակ Բայադյանը: Ինչպես տեղեկացրել է հոսպիտալի վերակենդանացման բաժնի պետ Հայկ Անտոնյանը, նա էլ ուղեղի ցնցում է ստացել և ունի հիշողության կորուստ:
«Մենք հիմա նրան ցավազրկման տակ ենք պահում», – տեղեկացրեց Անտոնյանը` հույս հայտնելով, որ մեղավորները կպատժվեն. – «Եղել են շատ դեպքեր, երբ մեղավորները պատասխանատվության չեն ենթարկվել, բայց ես ակնկալում եմ մեր ոստիկաններից, որ իրենք կկատարեն իրենց պարտքը: Եթե մարդ ամեն օր` առավոտից իրիկուն, միայնակ ծառայում է էս ազգին, օրական վարում է 30-40 հիվանդ, եթե ինքը մի կիրակի օրը պետք է իր ազատ ժամանակը տնօրիներ, ինձ թվում է, հենց իրենք պետք է ապահովեին այդ մարդու հանգիստը», – ասել է նա:
Ի դեպ, հիվանդանոցում է եղել նաև գործը քննող քննիչը: Նա «Ազատություն» ռադիոկայանին փոխանցել է, որ հարուցվել է քրեական գործ Քրեական օրենսգրքի 112-րդ հոդվածի առաջին մասով` դիտավորությամբ ծանր մարմնական վնաս հասցնելու հատկանիշներով: Քննիչի փոխանցմամբ, մեկ հոգի արդեն բերման է ենթարկվել. նա «Հարսնաքար» ռեստորանային համալիրի անվտանգության ծառայող է:
