Զբոսաշրջությունը համարվում է արդյունաբերության հզոր ճյուղ, և երբ այն ապահովի արդյունաբերության եկամտի 10%-ը, կարելի կլինի անվանել արդյունաբերական շահավետ ճյուղ: «Առաջին լրատվական»-ի հետ զրույցում Հայաստանի Ճամփորդական գործակալների միության փոխնախագահ Եղիշե Թանաշյանը տեսակետ հայտնեց, որ մեր երկրի զբոսաշրջային պոտենցիալը մեծ է, և սպասարկման, ծառայությունների մակարդակի, հնարավորությունների, որակի առումով ՀՀ-ն այդքան էլ հետ չի աշխարհի զարգացումներից, թեև, օրինակ, չի կարելի Վրաստանի հետ համեմատել, քանի որ ծառայությունների որակի և հյուրընկալության առումով նույնիսկ առաջ ենք անցել Վրաստանից:
«Եթե խոսում ենք մեր ֆիզիկական հնարավորությունների, այդ թվում՝ ենթակառուցվածքների մասին, մենք բավականին հետ ենք Վրաստանից: Այսինքն՝ ապրանքային առումով համընթացությունից հետ ենք ընկել»,- ասաց Ե. Թանաշյանը՝ հավելելով, որ այսօր աշխարհը շարժվում է զբոսաշրջության մի քանի այլ ուղղություններով, որով մենք փորձում ենք շարժվել, բայց համապատասխան ենթակառուցվածքների բացակայությունը դա թույլ չի տալիս: Խոսքը կորպորատիվ և բիզնես տուրիզմի զարգացման մասին է, որն այսօր աշխարհում նաև զբոսաշրջության ամենամեծ կտորներից մեկն է, և տենդենցը գնալով մեծանում է: Ըստ Ե. Թանաշյանի՝ այսօր մենք ձգտում ենք դրան, բայց ծառայություն մատուցողների քանակն ավելի մեծ է, քան ենթակառուցվածքների առկայությունը:
Գների առումով Ե. Թանաշյանը նշեց, որ այս տարի բավականին թանկ են եղել, և հավանաբար դա է պատճառը, որ կազմակերպված զբոսաշրջության որոշակի անկում է նկատվում. «Անկախ վիճակագրությունից, որ էկոնոմիկայի նախարարությունը կարող է հայտարարել, որ ունենք զբոսաշրջության աճ, այո, ընդհանուր առմամբ դա աճ է, որովհետև դրա մեջ մտնում են նաև տարբեր տեսակի գործարար և միջազգային տարբեր պատվիրակությունների այցեր, բայց կազմակերպված տուրիզմի առումով, որոնք իրականացվում են տուրօպերատորների միջոցով, կարող է ամառային ամիսներին անկում գրանցվել: Դա կարող է հակասական հնչել, շատերն ասեն՝ հյուրանոցներում տեղ չկա, ես կրկնում եմ՝ ընդհանուր աճ կա, բայց պետք է տարանջատել այդ աճն ինչի՞ հետ է կապված: Մենք պետք է ձգտենք, որ աճ լինի կազմակերպված զբոսաշրջության առումով, իսկ այդ մասով ամառվա ամիսներին չեմ կարծում, որ աճ կնկատենք»:
Միության փոխնախագահի տեղեկություններով, բավականին ակտիվություն կնկատվի սեպտեմբեր-հոկտեմբեր ամիսներին, ինչպես միշտ. «Ցավոք, միայն այդ երկու ամիսներն են, որ տարվա մեջ մի քիչ ակտիվ են լինում կազմակերպված տուրիզմի առումով»:
