Հայաստանի շուրջ 39 քննակենտրոններում (14-ը` Երևանում և ԼՂՀ 3 քննակենտրոններում) երեկ մեկնարկել են օտար լեզուների միասնական քննությունները: Քննություն է հանձնել 9175 դիմորդ, որոնցից՝ անգլերեն առարկայից քննություն հանձնելու դիմում-հայտ է ներկայացրել 8173, գերմաներենից՝ 521, ֆրանսերենից՝ 447, իսպաներենից՝ 25, իտալերենից՝ 4, իսկ պարսկերենից 5 դիմորդ:
Եթե մինչև այս պահը քննությունների ընթացքը համեմատաբար հանգիստ էր և առանձնապես դժգոհություններ չկային կազմված թեստերից, ապա անգլերենի թեստերը դիմորդներին անակնկալի են բերել` ինչպես շատերն են նշում, իրենց «շոկային բարդությամբ»:
ԳԹԿ մամլո խոսնակ Գայանե Մանուկյանը մեզ հետ զրույցում նշեց, որ իրենք բողոքներ անգլերենից դեռ չեն ստացել: Մինչդեռ մասնագետները բողոքում էին, որ դիմորդի համար 1-10 կետերի հարցերը շատ բարդեցված են եղել, որն անթերի լուծելու համար դիմորդը պետք է ունենա անգլերենից բացարձակ գիտելիքներ: Միջին գիտելիքների տիրապետող դիմորդը, ըստ մասնագետների, թեստերի կեսից ավելին սխալ կնշեր: Բացի այդ, նշվում էր, որ թեստերում կան բառեր, որոնք մասնագիտական են, հազվադեպ հանդիպող: Իսկ այն տեքստերը, որոնք հեշտ են եղել, պատասխաններն են բարդ ձևակերպված եղել:
Գայանե Մանուկյանը նշեց, որ թեստերը կազմող հեղինակները գաղտնի են մնում: Քննարկման կարգի համաձայն` բոլոր բողոքարկումներին կտրվի պարզաբանում քննությունների ավարտից հետո եռօրյա ժամկետում:
Հունիսի 22-ին կլինեն վերջին քննությունները, հայոց պատմություն և քիմիա առարկայով կեզարափակվի քննությունների առաջին փուլը:
Բացի այդ, հայոց լեզու և գրականության թեստերի հետ կապված (ի դեպ, 20 ստացողների թիվը «Հայոց լեզու և գրականություն» առարկայից հասնում է 200-ի) խոսակցություններ են շրջանառվում, ըստ որի՝ պատասխանները նախապես վաճառվել են՝ 500 ԱՄՆ դոլարով: Այս ամենը, Գայանե Մանուկյանի խոսքով, հնարավոր է, որ զրպարտություն է, ԳԹԿ-ն թեստերի պատասխանները դնում է քննության ավարտից մեկուկես ժամ հետո:
Այս տարի հետաքրքիր արդյունք է գրանցվել «Ռուսաց լեզու» առարկայից, երբ ամենաբարձր՝ 19,75 միավոր է ստացել է ընդամենը մեկ դիմորդ, իսկ ռուսաց լեզու առարկայի միջին միավորը եղել է 10,3-ը: Ըստ ԳԹԿ տվյալների` 17,5-20 միավոր է ստացել 32 դիմորդ (2,7%), 13,5-17,25` 206 (17,4%), 7,5-13,25` 684 (57,9%), դրական շեմը չի հաղթահարել 260 (22%) դիմորդ:
Նշենք, որ ռուսաց լեզվից միասնական քննությանը մասնակցելու դիմում-հայտ էր ներկայացրել 1285 դիմորդ, քննությանը ներկայացել էր 1182-ը:
Այնուամենայնիվ, թեստերը որակական առումով տարեցտարի կատարելագործվում են, մասնագետները տարեցտարի ավելի բարձր են գնահատում և հույս ունեն ավելի կատարելագործելու:
