ԼՂՀ-ում բողոք կա, որն ինչ-որ կերպ արտահայտվելու է, «Առաջին լրատվական»-ի հետ զրույցում ասաց «Արցախի Եվրոպական շարժում» ՀԿ նախագահ Հայկ Խանումյանը` խոսելով ԼՂՀ-ում նախագահական ընտրություններին ընդառաջ բնակչության նախընտրական տրամադրությունների մասին:
Հայկ Խանումյանն ասաց, որ Ղարաբաղում նախընտրական տրամադրություններ դեռ չեն զգացվում: Նրա կարծիքով` քարոզարշավի ժամանակ ժողովուրդն ավելի ակտիվ կսկսի արտահայտել իր տրամադրությունները: Ըստ Հ. Խանումյանի` դժգոհություններ կան տարբեր գերատեսչություններում աշխատող անձանց, սոցիալական տարբեր խմբերի, կուսակցությունների կողմից, բողոքը կա, և դա ինչ-որ կերպ արտահայտվելու է:
Անդրադառնալով ՀՅԴ-ի Արցախի ԿԿ-ի տարածած այն հաղորդագրությանը, թե կուսակցությունը գալիք նախագահական ընտրություններում պաշտպանելու է գործող նախագահ Բակո Սահակյանի թեկնածությունը, Հ. Խանումյանը տեղեկացրեց, որ վերջերս Դաշնակցության Արցախի Կենտրոնական կոմիտեի ներկայացուցիչ Դավիթ Իշխանյանը հարցազրույց էր տվել, որում բավական ծանր խոսքեր կային նախագահ Բակո Սահակյանի քաղաքականության հասցեին:
Ըստ Հ. Խանումյանի` Իշխանյանի և Կենտրոնական Կոմիտեի դիրքորոշումներն իրար հակասող են: «Միևնույն ժամանակ հայաստանյան Դաշնակցության ներկայացուցիչները նշեցին, որ Երևանից որևէ ճնշում չի եղել Արցախի Կենտրոնական կոմիտեի վրա, այնինչ Դավիթ Իշխանյանն իր հարցազրույցում նշել էր, որ որոշումը կայացվել է ՀՅԴ ներկայացուցիչ Հրանտ Մարգարյանի հետ միասին: Սա արդեն խոսում է Դաշնակցությունում առկա լուրջ խնդիրների մասին: Լուրջ դժգոհություններ կա Դաշնակցության շարքերում, քանի որ Վիտալի Բալասանյանը Դաշնակցության և երիտասարդության համար սիրված գործիչ է, կարծում եմ` զարգացումներ կլինեն»,- մեկնաբանեց Հայկ Խանումյանը` հավելելով, որ Դաշնակցության հայտարարությունը Դաշնակցության Արցախի ԿԿ-ի մի քանի ներկայացուցիչների որոշման արդյունքն է:
