Ադրբեջանական Turan լրատվական գործակալության փոխանցմամբ՝ միջազգային իրավապաշտպան կազմակերպությունները խստորեն դատապարտել են Ադրբեջանի իշխանություններին՝ «Եվրատեսիլ-2012» երաժշտական մրցույթից հետո լրագրողներին ու ընդդիմադիրներին հալածելու ու հետապնդելու համար:
Freedom House-ն իր լուրջ մտահոգությունն է հայտնել Ադրբեջանում լրագրողների ու ակտիվիստների ձերբակալությունների ու հետապնդումների կապակցությամբ: Freedom House-ի ներկայացուցիչ Սյուզան Քորքը հայտարարել է, որ Ադրբեջանի իշխանությունները պարտավոր են կատարել միջազգային հանրության առջև ստանձնած պարտավորությունները, սեփական օրենսդրությունն ու հարգել խոսքի ազատությունը:
Լրագրողների պաշտպանության միջազգային կոմիտեն Ադրբեջանի իշխանություններին կոչ է արել անհապաղ դադարեցնել ֆոտոլրագրող Մեհման Հուսեյնովի նկատմամբ հարուցված քրեական գործը՝ նրա ձերբակալությունը որակելով որպես մամուլի ազատության ու իրավունքների բացահայտ ճնշում:
Կոմիտեն ընդգծել է, որ «Եվրատեսիլ-2012»-ից հետո Ադրբեջանի իշխանություններն իսկական որս են սկսել մրցույթից առաջ Բաքվում ընդդիմության կազմակերպած ակցիաների մասնակիցների նկատմամբ:
Human Rights Watch (HRW) կազմակերպության տարածած հայտարարության մեջ նշված է, որ Հուսեյնովին հալածելը դարձավ իշխանությունների պատասխանը՝ ֆոտոլրագրողի կողմից «Եվրատեսիլ-2012»-ի քննադատության և ընդդիմադիրների նկատմամբ ոստիկանության գործադրած բռնությունների վերաբերյալ ֆոտոնյութերի հրապարակման դեմ:
HRW-ն գտնում է, որ Հուսեյնովի ու մյուսների նկատմամբ քրեական գործերն ու ձերբակալությունները հանդիսանում են մնացյալ բոլոր ընդդիմադիրներին ու ակտիվիստներին հասցեագրած իշխանությունների ազդանշանը՝ ճնշելու համար իրենց իրավունքներն ու ազատությունները պաշտպանելու նրանց կամքը:
