«Երկիր»-ը զրուցել է ԱԺ 4-րդ գումարման պատգամավոր, ԲՀԿ-ական Վարդան Բոստանջյանի հետ.
-Պրն Բոստանջյան, հիմա, երբ այլևս պատգամավոր չեք և հիմնականում գիտամանկավարժական աշխատանքով եք զբաղվում, Ձեզ ավելի՞ հանգիստ ու խաղաղ եք զգում:
-Մեկը մյուսի հետ համեմատելը երևի թե էնքան էլ ճիշտ չի: Գործունեության այս տեսակը երկար ժամանակ ու միշտ է եղել ինձ մոտ, և հիմա ստացվել է այնպես, որ այս պահին ես գտնվում եմ միայն գիտամանկավարժական գործունեության դաշտում: Բնականաբար, այն չափազանց հետաքրքիր է, և էդ տիրույթում գտնվելն ինձ միշտ մեծ հաճույք է պատճառել: Ինչ վերաբերում է օրենսդրական գործունեությանը, ապա դա այլ մակարդակ է, որը ևս իր հետաքրքրություններն ունի:
-Այսինքն՝ չե՞ք ափսոսում այն հինգ տարիների համար, որ անցկացրել եք Ազգային ժողովում:
-Ես ընդհանրապես չեմ ափսոսում որևէ մի քայլի համար, որովհետև ցանկացած տեղում գտնվելով, այդ թվում նաև` Աժ-ում, ես աշխատել եմ միշտ ներկայանալ ու հանդես գալ առավելագույնս լավ մակարդակով:
-Մշտապես ակտիվ քաղաքական գործիչ եք եղել ու այսօր մի քիչ խորթ է ձեր պասիվությունը: Քաղաքականությո՞ւնն է սկսել Ձեզ քիչ հետւարքրել:
-Քաղաքականությունն ինձ երբեք չի դադարել հետաքրքրելուց. ես այսօր էլ բոլոր հրատարակվող թերթերը կարդում եմ և քաղաքական ընթացքի վերաբերյալ չեմ կարող որևէ բան չիմանալ: Պարզապես ստացվել է այնպես, որ այս նստաշրջանում ես չեմ գտնվում քննարկողների դաշտում:
-Այն իրավիճակը, որում հայտնվեցիք, Ձեզ համար անակնկա՞լ էր:
-Ինչ-որ տեղ՝ այո, կարող եմ այդ «ինչ-որ տեղն» էլ չասել՝ այո, անակնկալ էր:
-Պատճառներն անհա՞յտ էին Ձեզ:
-Ես չեմ հետաքրքրվում և չեմ խորասուզվում դրանց մեջ: ,,
-Քաղաքական շրջանակներում Ձեզ վերջին անգամ տեսել են ՀՅԴ-ի նախընտրական ծրագրի ներկայացման ժամանակ, ինչն էլ տարբեր մեկնաբանությունների տեղիք տվեց…
-Ինձ հրավիրել էին իրենց ծրագրի քննարկումներին, իսկ դրանից 10 օր առաջ ինձ հրավիրել էին, որպեսզի ծանոթանամ այդ ծրագրին, և այդ պարագայում ես պարզապես իմ խոսքն եմ ասել: Իսկ ընդհանրապես, Հայաստանի քաղաքական ներկապնակում ես միշտ ՀՅԴ-ին համարել եմ բարձր քաղաքական ուժ:
-Շարունակում եք մնալ ԲՀԿ-ի անդամ, հնարավո՞ր է, որ փոխեք մտադրությունը և դուրս գաք կուսակցությունից:
-Այս պահին ընդհանրապես չեմ մտածում այդ մասին, եթե, իհարկե, հանկարծ կուսակցությունը չմտածի ինձ հեռացնելու մասին:
-Ինչո՞ւ է ձեր մտքով նման բան անցնում…
-Չէ, ուղղակի մտածում եմ, որ եթե ցուցակում չեմ հայտնվել, ուրեմն ամեն ինչ էլ հնարավոր է:
-ԲՀԿ-ի՝ կոալիցիայի մաս չդառնալու որոշումն ինչպե՞ս ընդունեցիք:
-Ես հակված չեմ դրա մասին կարծիքներ ասել, միայն այն գիտեմ, որ կառավարման կոալիցիոն սկզբունքը կարեւորագույն սկզբունք է, որը կիրառվում է ամբողջ աշխարհում: Հիմա, եթե քաղաքական որևէ ուժ նպատակահարմար չի գտնում կոալիցիոն իշխանության մաս կազմելու, ապա ավելի լավ է այդ մասին հարցնեք իրենց:
-Իսկ հետևո՞ւմ եք Վարդան Օսկանյանի շուրջ տեղի ունեցող իրադարձություններին: Տեսնո՞ւմ եք այդտեղ քաղաքական ենթատեքստ:
-Մեր ղեկավարությունն այդքան միամիտ քայլերի չի կարող դիմել, որպեսզի քաղաքական հետապնդում իրականացնի, ի՞նչ նպատակով, ինչի՞ համար: Պարզապես գոյություն ունի խնդիր, և այդ խնդիրների վերաբերյալ մեր համապատասխան կառույցները հանդես են բերում հետևողականություն: Ես մտածում եմ, որ այստեղ քաղաքական հիմքեր փնտրելը սխալ է:
-Կարծիքներ կան, որ այս կերպ Օսկանյանին փորձում են չեզոքացնել քաղաքական ասպարեզից…
-Դա սխալ կարծիք է:
-Նորընտիր Աժ-ի կազմն ինչպե՞ս կբնութագրեք:
-Ես, ընդհանրապես, լավատես մարդ եմ, և մտածում եմ, որ այս Աժ-ի արդյունավետությունն ավելի բարձր կլինի, քան նախորդներինը:
-Հնարավո՞ր է, որ առաջիկա տարիներին կրկին վերադառնաք մեծ քաղաքականություն:
-ժամանակը ցույց կտա:
-Բայց Աժ-ը դեռ գրավո՞ւմ է Ձեզ, կրկին պատգամավոր լինելու ցանկություն չունե՞ք:
-Իսկ ինչո՞ւ պիտի ցանկություն չունենամ, հո ցանկությունս էդպես լիրիկական չծագեց ու վերացավ: Ես միշտ էլ կունենամ ձգտում` գտնվել կարևոր տեղում և ավելի մեծ նպաստ բերել իմ երկրին:
