Հունիսի 15-ին ՀՀ ոստիկանությունում տեղի է ունեցել ընդլայնված խորհրդակցություն, որը վարել է ոստիկանության պետ, գեներալ-լեյտենանտ Վլադիմիր Գասպարյանը:Այս մասին «Առաջին լրատվական»-ին հայտնել են ոստիկանության լրատվական ծառայությունից:
Խորհրդակցությանը մասնակցել են ոստիկանության կոլեգիայի անդամներ, մարզային վարչությունների, բաժինների պետեր, ինչպես և այլ ստորաբաժանումների ու ծառայությունների ղեկավարներ:
Ոստիկանության պետ Վլադիմիր Գասպարյանն անդրադառնալով օպերատիվ-ծառայողական գործունեությանը, արձանագրված ցուցանիշներին և բարեփոխումների ընթացքին` նշել է, որ, այնուամենայնիվ, դեռևս կան ծառայողներ, որոնք լիովին չեն ընկալել ընթացող փոփոխությունների ողջ խորությունն ու անշրջելիությունը և հստակ չեն պատկերացնում նպատակը, որին ուղղված են ոստիկանության ղեկավարության գործողությունները:
Վլադիմիր Գասպարյանը կրկին շեշտել է յուրաքանչյուր ոստիկանի ներքին բարեփոխման, ոստիկանության գործունեության հիմքում բարոյականության, պատվի, արժանապատվության արժեքները դնելու անհրաժեշտությունը` գլխավոր ցուցիչ ունենալով ազնիվ, անկաշառ ու պրոֆեսիոնալ աշխատանքը:
Խոսելով ոստիկանության աշխատանքում տեղ գտած թերությունների մասին` Վլադիմիր Գասպարյանը նշել է, որ դեռևս գոհացուցիչ չէ կատարողական կարգապահության մակարդակը: Մասնավորապես, չնայած համապատասխան ցուցումներին ու հանձնարարականներին, դեռ արձանագրվում են հատկապես գյուղմթերքներ տեղափոխող ավտոմեքենաներն անհիմն ու անհարկի կանգնեցնելու դեպքեր, միշտ չէ, որ պատշաճ վերաբերմունք է ցուցաբերվում ապօրինի ծառահատումներին:
Ոստիկանության պետը ճանապարհային ոստիկանության ղեկավարությանը մեկ անգամ ևս հրահանգել է առավելագույնս պահանջկոտ լինել անծածկոց թափքերով բեռնափոխադրումներ իրականացնող բեռնատարների, գերհզոր ազդանշանային սարքերով, վերասարքավորված խլացուցիչներով մեքենաների վարորդների և ընդհանրապես ճանապարհային երթևեկության կանոնները խախտողների նկատմամբ, քանի որ տվյալ դեպքում խոսքը վերաբերում է մեր քաղաքացիների կյանքին ու առողջությանը:
Անդրադառնալով ծառայողական և կատարողական կարգապահության ամրապնդման, աշխատանքի արդյունավետության բարելավման, բարոյահոգեբանական մթնոլորտի փոփոխության խնդիրներին` Վլադիմիր Գասպարյանը նշել է, որ մի շարք բաժինների թերացած պետեր արդեն իսկ տույժեր են ստացել, ոմանք ազատվել են զբաղեցրած պաշտոններից, և այդ ուղղությամբ խստապահանջ ու հետևողական աշխատանքը շարունակվելու է:
Ոստիկանությունը ծառայում է հասարակությանը և այդ ծառայության գնահատականը հենց հասարակությունը կտա` շեշտել է ոստիկանության պետը` նշելով, որ շուտով վերսկսելու է մարզային այցելությունները և անպայման հանդիպումներ է ունենալու համայնքներում` ոստիկանության աշխատանքի գնահատականն անմիջաբար բնակչությունից ստանալու համար:
Ամփոփելով խորհրդակցությունը` ոստիկանության պետ Վլադիմիր Գասպարյանը մասնակիցներին կրկին կոչ է արել հրատապ միջոցներ ձեռնարկել ստորաբաժանումներում բարոյահոգեբանական մթնոլորտի առողջացման, կադրերի մարդկային ու մասնագիտական որակների կատարելագործման, հասարակության հետ համագործակցության խորացման և վերջնականապես միակամ ու միասնական ոստիկանական կառույց ձևավորելու համար:
