Իտալացի գիտնականներ Ալեսանդրո Վեցոզին և Գաբրիելե Մորոլլին ֆլորենցիական Մեդիչի-Ռիկարդի Պալացոյի Միկելլոցո բակում գտնվող հարթաքանդակը վերագրել են Միքելանջելոյին: Իրենց հետազոտության արդյունքները, որոնք հրապարակվել են Michelangelo Assoluto գրքում, արվեստաբանները ներկայացրել են հունիսի 14-ին։ Այս մասին հաղորդում է Arte պորտալը:
Նրանց կարծիքով՝ Վեներային ու Կուպիդոնին պատկերող հարթաքանդակի թե՛ պատկերագրությունը, թե՛ տեխնիկան ցույց են տալիս, որ հեղինակը իտալացի վարպետն է: Վեցոզին և Մորոլլին նշում են, որ Միքելանջելոյի ձեռագիրը հատկապես զգացվում է Կուպիդոնի պատկերում` նրա դիրքը և «շարժումները» հիշեցնում են Միքելանջելոյի «Թադեի տիրամայր» և «Պիթի տիրամայր» մարմարե ռելիեֆներում պատկերված մանուկների կերպարները:
Գիտնականները նշում են նաև, որ հարթաքանդակը գեղանկարիչ Պոնտորմոյի «Վեներա և Կուպիդոն» նկարի արտացոլումն է քանդակում, որն արվել է Միքելանջելոյի էսքիզով: Ինչպես հարթաքանդակում, այնպես էլ գեղանկարում, Կուպիդոնը պատկերված է Վեներային համբուրելիս:
«Վեներա և Կուպիդոն» մարմարե հարթաքանդակը, որի չափսերը 58×43 սմ են, վերագրվում է 1504 թվականին: Միքելանջելոյի աշխատանքը, որը տեղադրված է հունական և հռոմեական մարմարե հարթաքանդակների միջև, Պալացոյում հայտնվել է 19-րդ դարի սկզբին:
Մեդիչի-Ռիկարդի Պալացոն կառուցվել է 1445-1460 թվականներին՝ ճարտարապետ Միկելոցցոյի նախագծով: Այժմ պալատում գտնվում է Ռիկարդյան գրադարանը, որը բացվել է 19-րդ դարի սկզբին:
