Հունիսի 15-ին արտգործնախարար Էդվարդ Նալբանդյանն ընդունել է ճապոնական «Սոկա Գակայ» շարժման փոխնախագահ Կենյի Յոշիգոյին և ներկայացուցիչ Էյչի Օուչիին, որոնք Հայաստան են ժամանել շարժման երկարամյա նախագահ Դայսակու Իկեդայի լուսանկարների ցուցահանդեսի բացման կապակցությամբ:
ՀՀ ԱԳՆ մամլո գրասենյակից «Առաջին լրատվական»-ին հայտնում են, որ հանդիպման ընթացքում նախարար Նալբանդյանը շեշտել է, որ ճապոնական ժողովրդի ձեռքբերումները և նրա ներդրումը մարդկային քաղաքակրթության զարգացման մեջ անգնահատելի են, և որ հայ ժողովուրդը երախտապարտ է Ճապոնիային՝ Հայաստանի զարգացման տարբեր ոլորտներում ցուցաբերած աջակցության համար:
Նախարար Նալբանդյանը նշել է, որ հայկական պատվիրակությունը ամենաջերմ հիշողություններն ունի Ճապոնիա ՀՀ նախագահի պաշտոնական այցելության շրջանակներում «Սոկա» համալսարանի ուսանողների, դասախոսների հետ հանդիպումից, եւ ՀՀ Նախագահին համալսարանի պատվավոր դոկտորի աստիճանի շնորհման հանդիսավոր արարողությունից:
«Սոկա Գակայ»-ի փոխնախագահ Կենյի Յոշիգոյին նշել է, որ շատ ուրախ է լինել Հայաստանում և շնորհակալ է ջերմ հյուրընկալության համար: Պարոն Յոշիգոյը հիշատակել է, որ իրենց համար մեծ իրադարձություն էր Հայաստանի նախագահ Սերժ Սարգսյանի այցելությունը և ելույթը Սոկայի համալսարանում, և պատիվ՝ շնորհել նրան համալսարանի պատվավոր դոկտորի աստիճանը: «Սոկա Գակայ»-ի փոխնախագահը հավելել է, որ շարժման հիմնական նպատակներն են հանդիսանում կրթության որպես բարձրագույն արժեքի, գիտական առաջընթացի, մշակութային փոխանակման և կայուն զարգացման խրախուսումը ամբողջ աշխարհում:
Հանդիպման ընթացքում քննարկվել են նաև հայ-ճապոնական համագործակցությանը վերաբերող տարբեր հարցեր:
