Այսօր «Դիջիթեք» բիզնես ֆորումի բացմանը ներկա էր նաև ՀՀ-ում ԱՄՆ դեսպան Ջոն Հեֆերնը: «DigiTec Business» ցուցահանդեսի ժամանակ նա հատուկ հետաքրքրությամբ ուսումնասիրում էր ՊԵԿ տաղավարում ներկայացված նորարարությունները: «Առաջին լրատվական»-ը առիթ ունեցավ մի քանի հարց ուղղելու ԱՄՆ դեսպան Ջոն Հեֆերնին:
– Պարոն դեսպան, ակտիվորեն մասնակցում եք «Դիջիթեք» բիզնես ֆորումին: Ի՞նչ կարիծիքի եք միջոցառման մասին:
– Մենք այս միջոցառումներին ուրախությամբ ենք մանակցում: Տեղեկատվական տեխնոլոգիաների ոլորտը Հայաստանում ամենաարագ աճող և ամենահետաքրքիր ոլորտներից մեկն է, և ԱՄՆ դեսպանատունը, Միջազգային զարգացման գործակալությունը հետաքրքրված են, որ հայկական ու ամերիկյան ընկերությունները միասին աշխատեն այս ոլորտի զարգացումն ապահովելու համար: Ուստի մենք ցանկանում ենք նպաստել այդ աշխատանքներին, որպեսզի ոլորտը զարգանա և հաջողութունների հասնի Հայաստանում:
– Հայկական ՏՏ ոլորտի ներուժն ինչպե՞ս եք գնահատում:
– Արդեն իսկ արագ տեմպերով աճող ոլորտ է: Ներուժի խնդիր չկա, շատ ավելի մեծ տեմպեր կարող է այն ունենալ: Ես կանոնավոր հանդիպումներ եմ ունենում ՏՏ ոլորտի ընկերությունների հետ, և բոլորն ասում են, որ ոլորտի զարգացումը շատ ավելի արագ կարող է լինել, եթե լինեն համապատասխան կադրեր: Դա նշանակում է, որ այս ոլորտում աշխատատեղեր կան, և, երբ համապատասխան կադրեր լինեն, երիտասարդ հայերը հնարավորություն ունեն և համապատասխան կրթություն ստանալուց հետո կարող են աշխատանք գտնել այս ոլորտում:
– Պրն Հեֆերն, Դուք ծանոթացաք նաև ՊԵԿ-ի նորարար լուծումներին: Ի՞նչ եք կարծում, որքանո՞վ է ներդրումային միջավայրը նպաստում, որպեսզի ՏՏ-ն զարգանա Հայաստանում:
– Ես ուրախ էի նկատել, որ Պետական եկամուտների կոմիտեն ավտոմատացնում է հարկային և մաքսային հաշվետվությունների ու հայտարարագրերի համակարգերը: Կարծում եմ՝ դա շատ օգտակար կլինի:
