Թուրքական Dünya Bülteni կայքի փոխանցմամբ՝ Թուրքիայի Սահմանադրական դատարանը կայացրել է Թուրքիայի 11-րդ նախագահ Աբդուլլահ Գյուլի պաշտոնավարման ժամկետի շուրջ իր վճիռը: Ինչպես և սպասվում էր, Սահմանադրական դատարանը հաստատեց, որ Գյուլը պաշտոնավարելու է ոչ թե 5, այլ 7 տարի, այսինքն մինչև 2014 թվականը:
Սակայն այստեղ ուշագրավն այլ բան է. Աբդուլլահ Գյուլին հնարավորություն է տրվել ոչ միայն պաշտոնավարել 7 տարով, այլև վերընտրվել, ճիշտ է՝ արդեն ոչ թե 7, այլ 5 տարի ժամկետով՝ համաձայն 2010 թ. սեպտեմբերի 12-ին Թուրքիայում անցկացված սահմանադրական բարեփոխումների մասին հանրաքվեի արդյունքների:
Հիշեցնենք, որ թուրքական ընդդիմության առաջնորդ Քեմալ Քըլըչդարօղլուն տարեսկզբին պահանջում էր, որ 2012 թվականին Թուրքիայում անցկացվեն նախագահական ընտրություններ: Սա նա հիմնավորում էր 2007 թ. մայիսին Թուրքիայի Ազգային մեծ ժողովի (ԹԱՄԺ) ընդունած և հոկտեմբերի 21-ի հանրաքվեի արդյունքներով (կողմ 69%, դեմ 31%) հաստատված սահմանադրական ուղղումներով:
Ըստ այդ ուղղումների` այսուհետ Թուրքիայի նախագահը պետք է ընտրվի ժողովրդի կողմից` 5+5 տարբերակով. 5 տարի ժամկետով` ևս մեկ անգամ նույն ժամկետով վերընտրվելու հնարավորությամբ: Պետք է նշել, որ մինչ այդ երկրի նախագահին ընտրում էր ԹԱՄԺ-ը` 7 տարի ժամկետով, առանց վերընտրման իրավունքի: Բացի դրանից՝ տվյալ ուղղումներով ԹԱՄԺ պատգամավորների լիազորությունների ժամկետը 5 տարուց կրճատվեց 4 տարվա:
Այս ամենը նկատի ունենալով` Քըլըչդարօղլուն ընդգծում էր, որ այդ ուղղումներն արդեն իսկ ազդել են խորհրդարանական ընտրությունների վրա, որոնք անցկացվել են 2011 թ. հունիսի 12-ին, և դա այն դեպքում, երբ նախորդ խորհրդարանական ընտրությունները Թուրքիայում անցկացվել էին դրանից ոչ թե 5, այլ 4 տարի առաջ` 2007 թ. հուլիսի 22-ին: Հետևաբար, ըստ Քըլըչդարօղլուի` խորհրդարանական ընտրությունների վրա արդեն իսկ ազդած այդ ուղղումները պետք է նմանատիպ ձևով ազդեն նաև նախագահական ընտրությունների վրա, որոնք պետք է անցկացվեն 2012 և ոչ թե 2014 թվականին: Աբդուլլահ Գյուլը Թուրքիայի խորհրդարանի կողմից երկրի 11-րդ նախագահ է ընտրվել 2007 թ. օգոստոսի 28-ին:
