Իսպանիայի առաջնության 22-րդ տուրի կենտրոնական հանդիպումը կայացավ հանրահայտ «Նոու Կամպ» մարզադաշտում: Ինչպես և սպասվում էր «Բարսելոնա»-ն հեշտ հաղթանակ տարավ «Ատլետիկո Մադրիդ»-ի նկատմամբ և թարմացրեց Մադրիդի «Ռեալ»-ի կես դար վաղեմություն ունեցող ռեկորդը. Ռեալը 1960/61 մրցաշրջանում Իսպանիայի առաջնության 15 անընդմեջ խաղերում առավելության էր հասել մրցակիցների նկատմամբ, իսկ այս հաղթանակը կատալոնացիների համար անընդմեջ 16-րդն էր: Հանդիպման երեք գնդակն էլ հեղինակեց աշխարհի լավագույն ֆուտբոլիստ Լիոնել Մեսսին, ով իր խփած գոլերի թիվը հասցրեց 24-ի:
Անակնկալ պարտություն կրեց «Վիլյառեալ»-ը: Խուան Կարլոս Գարիդոյի սաները սեփական հարկի տակ 0:1 հաշվով զիջեցին մրցաշարային աղյուսակի ետնապահ «Լևանտե»-ին:
Մադրիդի «Ռեալ»-ը վերջապես իրեն արժանի խաղ ցուցադրեց: «Արքայական» ակումբը 4:1 հաշվով տպավորիչ հաղթանակ տարավ «Ռեալ Սոսյեդադ»-ի նկատմամբ: 8-րդ րոպեին հաշիվը բացեց Կական: Այնուհետև 21-րդ և 42-րդ րոպեներին Ռոնալդուն դարձավ դուբլի հեղինակ և ռմբարկուների պայքարում կրկին երկու գնդակով առաջ անցավ Մեսսիից: 72-րդ րոպեին Ալվարո Արբելոան դարձավ ինքնագոլի հեղինակ, իսկ հանդիպման վերջակետը դրեց մադրիդցիների նորեկ Ադեբայորը, ով հրաշալի անցկացրեց հանդիպումը:
«Ռեալ»-ը վերջին անգամ Իգուայինի վնասվածք ստանալուց առաջ էր նման որակի խաղ ցուցադրել:
Մյուս հանդիպումներում գրանցվեցին հետևյալ արդյունքները` «Ալմերիա»-«Էսպանյոլ»` 3:2, «Ատլետիկ Բիլբաո»-«Սպորտինգ»` 3:0, «Խետաֆե»-«Դեպորտիվո»` 4:1, «Օսասունա»-«Մալյորկա»` 1:1, «Սարագոսա»-«Ռասինգ»` 1:1, «Սևիլիա»-«Մալագա»` 0:0, «Վալենսիա»-«Հերկուլես»`2:0: