Մեծ Բրիտանիայի վարչապետ Դևիդ Քեմերոնը ցուցմունք է տվել լորդ Լևեսոնի հանձնաժողովում, որը դիտարկում է բրիտանական մամուլի էթիկայի նորմերը և իշխանական կառույցների հարաբերությունները ԶԼՄ-ների հետ:
Ինչպես տեղեկացրել է Svoboda ռադիոկայանը, ցուցմունք տալու ժամանակ վարչապետը նյարդային է եղել: Նրան ուղղված հարցերի մի մասը վերաբերել է նրա և Ռեբեկա Բրուքսի հարաբերություններին, ով եղել է News International ընկերության ղեկավարը, որի մի մասը պատկանում է Մերդոկի կորպորացիային: Ներկա պահին Բրուքսը գտնվում է հետաքննության տակ:
Հաստատվել է, որ Քեմերոնի և նրա հարաբերություններն ընկերական են եղել: Բայց դրա հետ մեկտեղ Քեմերոնը ժխտել է, որ քաղաքական ծառայություններ է մատուցել Մերդոկի կորպորացիային՝ փոխարենն ընտրություններում նրա աջակցությունը ստանալու համար:
Դևիդ Քեմերոնը նաև նշել է, որ վերջին ժամանակներս քաղաքական գործիչների և ԶԼՄ–ների հարաբերությունները վատթարացել են:
Հիշեցնենք, որ անկախ հանձնաժողովը ստեղծվել է կառավարության նախաձեռնությամբ և մինչ հետաքննության ավարտը պետք է հանձնարարականներ մշակի կառավարության և մամուլի համար: Հանձնաժողովում արդեն ցուցմունքներ են տվել նախկին վարչապետներ Ջոն Մեյջորը, Թոնի Բլեերը, Գորդոն Բրաունը:
