«Ըստ լավատեղյակների՝ Գագիկ Ծառուկյանին այնքան էլ հեշտ չի հաջողվել համոզել Վայքի մարզպետ Սերգեյ Բագրատյանին, որ հրաժարականի դիմում գրի, որպեսզի ԲՀԿ-ում կուսակցությունից դուրս գալու շղթայական ռեակցիա չառաջանա»,- գրում է «Հրապարակ»-ը և հավելում.
«Գաղտնիք չէ՝ ԲՀԿ-ում բոլորը, շունչները պահած, սպասում էին, թե ինչպես կավարտվի այդ գործընթացը: ԲՀԿ-ի՝ կառավարության անդամների հետ հանդիպման ժամանակ Գ. Ծառուկյանը բոլորի ներկայությամբ «վերջին խոսքերն» է ասել Սերգեյի հասցեին, հետն էլ՝ «բայց դու խաբա՞ր ես եղել ոնց ես մարզպետ դառել, որ հիմա էլ չես ուզում հրաժարական գրես…»:
Այդքանով բանը չի ավարտվել: Հաջորդ օրը Վայքից բավականին պատկառելի պատվիրակություն է եկել Ծառուկյանի մոտ, հիմնականում կռված, երկրապահ տղերքից կազմված՝ բարեխոսելու, որ Սերգեյ Բագրատյանը լավ մարզպետ է, «լավ կըլնի մնա»: էս անգամ արդեն Ծառուկյանը խիստ է բարկացել: Բայց սա էլ վերջը չի եղել, մեկ էլ պարզվել է, որ ներկաների մեջ է Բագրատյանի որդին, որը բոլորի հետ «հավասար պայմաններում» ստիպված է եղել ունկնդրել ԲՀԿ առաջնորդի բավականին «տպավորիչ» որակումները հոր հասցեին: Տեսնելով նրան՝ Ծառուկյանը զգացել է, որ մի քիչ «շատ է ասել», ներողություն է խնդրել Բագրատյանի որդուց»:
