Հայ-ադրբեջանական սահմանագծի հյուսիսարևելյան ուղղությամբ՝ Տավուշում, այսօր ադրբեջանական կողմից հրադադարի ռեժիմի խախտման նոր դեպքեր են գրանցվել: «Առաջին լրատվական»-ի հետ զրույցում այս մասին հայտնեցին ՊՆ հասարակայնության հետ կապերի վարչությունից՝ միաժամանակ խորհուրդ տալով կոնկրետ ոստիկանությունից կամ պետավտոտեսչությունից ճշտել՝ հավաստի՞ են լուրերը, որ կրակոցների պատճառով ոստիկանները փակել են դեպի Տավուշի որոշ գյուղեր տանող ճանապարհները:
«Առաջին լրատվական»-ի թղթակցին նույնը խորհուրդ տվեցին նաև ՊՆ քննչական բաժնի հասարակայնության հետ կապերի վարչությունից:
Զանգահարեցինք Ոստիկանության Տավուշի մարզային վարչություն, որտեղ շտաբի հերթապահ մասի ավագ տեսուչ Բլբուլյան ներկայացած անձը հաստատեց, որ իրենք ճանապարհների փակ լինելու մասին պաշտոնական տեղեկատվության չեն տիրապետում:
Նա, միաժամանակ, չբացառեց, որ կենցաղային անհարմարություններից խուսափելու համար ավտոտեսուչները քաղաքացիներին հորդորեն երթևեկել այլ ճանապարհով:
Նշենք, որ մի շարք լրատվամիջոցներում տարածված լուրերի համաձայն՝ Վրաստանից Հայաստան մտնելիս, Տավուշի մարզի որոշակի ճանապարհահատվածում ճանապարհային ոստիկանության աշխատակիցները թույլ չեն տալիս, որ մեքենաները մարզի մի քանի գյուղերի ուղղությամբ գնան և առաջարկում են մայրաքաղաք հասնել մեկ այլ ճանապարհով:
