ՄԱԿ-ի և Արաբական պետությունների լիգայի՝ Սիրիայի հարցերով հատուկ բանագնաց Քոֆի Անանի տեղակալ Ահմադ Ֆաուզին հայտնել է, որ ՄԱԿ-ի դիտորդները գրանցել են սիրիական բանակի կողմից հարվածային ուղղաթիռների կիրառման դեպքեր,- գրում է բրիտանական The Guardian-ը:
Ֆաուզիի խոսքերով՝ սա առաջին դեպքն է, երբ դիտորդներն իրենց աչքերով տեսել և համոզվել են, ու կառավարական զորքերը քաղաքներին հարվածներ են հասցնում նաև օդից:
Ընդ որում, դիվանագետը խուսափել է ուղղակի պատասխանել այն հարցին, թե որքանով է նպատակահարմար Սիրիայի վրա «ոչ թռիչքային գոտի» սահմանելը: «Գիտեք, կրակի դադարեցմանը պետք է հետևել և՛ ցամաքում, և՛ օդում: Մենք կոչ ենք անում հակամարտության բոլոր կողմերին հրաժարվել բռնությունից: Իսկ ոչ թռիչքային գոտու սահմանումը ՄԱԿ-ի Անվտանգութան խորհրդի արտոնությունն է»,- ասել է Ֆաուզին:
Ավելի վաղ սիրիացի ապստամբները մեղադրում էին կառավարական ուժերին ուղղաթիռներ կիրառելու մեջ և անգամ համապատասխան տեսագրություններ էին ներկայացնում: Սակայն այդ տեղեկությունն անկախ աղբյուրներից չէր հաստատվում:
Հիշեցնենք. ԱՄՆ-ը բազմիցս մեղադրել է Ռուսաստանին Բաշար Ալ-Ասադի կառավարությանը մարտական ուղղաթիռներ ուղարկելու մեջ:
