«Էքստրիմ» ակումբի նախագահ, «Սահմաններ չկան, կան արգելքներ» սահմանափակ հնարավորություններով մարդկանց համար սպորտային ծրագրի ղեկավար Գոռ Հովհաննիսյանն այսօր լրագրողներին ներկայացրեց իրենց ակումբի այն ծրագրերը, որոնք ուղղված են հաշմանդամություն ունեցող մարդկանց էքստրիմն ապահովելուն:
Նա նշեց, որ ապագայում ծրագրված է հաղթահարել ՀՀ բոլոր գագաթները՝ սկսած ամենացածրից, վերջացրած Արագածով. «Մենք պատրաստ ենք ապահովել բոլոր հաշմանդամների արշավը: Եթե գոնե 2 տոկոսը կարողանա ինքնուրույն բարձրանալ, մնացած 98 տոկոսին պատրաստ ենք տանել ուսերի վրա»:
Գ. Հովհաննիսյանի խոսքով՝ իրենց ակումբը հագեցած է հաշմանդամների արշավն ապահովող տեխնիկայով, անհրաժեշտության դեպքում հաշմանդամին կարող են տեղափոխման պարագաներով իջեցնել բարձունքից:
Խոսելով արգելքների մասին՝ բանախոսն ասաց, որ գլխավոր արգելքը հոգեբանականն է, որովհետև հաշմանդամները վախենում են, թե չեն կարողանա հաղթահարել բարձունքը:
Ասուլիսին ներկա և տեղաշարժվելու սահմանափակ հնարավորություն ունեցող Արև Մելքոնյանը հավաստեց, որ հաշմանդամի համար գլխավոր արգելքը հոգեբանական անպատրաստվածությունն է. «Մեզ հետ զրուցում են, խորհրդակցում: Առաջին արշավին 4-5 օր պատրաստվեցինք և կարողացանք հեշտությամբ հաղթահարել բարձունքը»:
