Իսրայելի նախագահ Շիմոն Պերեսը ԱՄՆ պետքարտուղար Հիլաի Քլինթոնի հետ հանդիպմանը կոչ է արել արևմտյան երկրներին չմիջամտել Սիրիայի դրությանը: Ինչպես հաղորդում է իսրայելական Kursor պորտալը, Պերեսը կարծում է, որ այդ հակամարտությունը պետք է լուծվի արաբական երկրների ուժերով: Մյուս երկրները պետք է զերծ մնան միջամտությունից, որպեսզի հետագայում չմեղադրվեն ռազմական ներխուժման մեջ:
«Արաբական երկրները պատրաստ են դրան, թող նրանք իրենց վրա պատասխանատվություն վերցնեն, իսկ մենք կաջակցենք նրանց դրանում, եթե կարողանանք: Արաբական պետությունների լիգան պետք է և ի վիճակի է դա անել»,- ասել է Շիմոն Պերեսը:
Պետքարտուղար Հիլարի Քլինթոնն իր հերթին նշել է, որ ԱՄՆ-ը նախկինի պես աջակցում է ՄԱԿ-ի և ԱՊԼ հատուկ բանագնաց Քոֆի Անանի ծրագրին: Նրա խոսքերով՝ դա լավ ծրագիր է, սակայն առայժմ չի իրականացվում:
«Անհարգալից վերաբերմունքը և այդ ծրագրի առաջին սկզբունքից (այն է՝ Ասադի վարչակարգի կողմից բռնության դադարեցումը) հրաժարվելը, իհարկե, ոչ միայն լուրջ հարված է Սիրիայի ժողովրդին, այլև միջազգային հանրությանը, որը փորձում է վերջ տալ այդ չդադարող հակամարտությանը»,- ասել է Քլինթոնը:
Հիշեցնենք. ավելի վաղ Սիրիայի ազգային խորհրդի նոր ղեկավար Աբդել Բասետ Սեյդան կոչ էր արել միջազգային հանրությանը չսահմանափակվել Բաշար Ալ-Ասադի դեմ պատժամիջոցներով և դիմել ռազմական միջամտության:
